Eigendur Hornbjargs lögðu ríkið í héraði

Héraðsdómur Vesturlands felldi á föstudag úr gildi úrskurð óbyggðanefndar um að Hornbjarg á Vestfjörðum væri þjóðlenda. Dómstóllinn staðfesti aftur á móti úrskurð nefndarinnar um að Bjarnarnes teljist þjóðlenda. Á fimmta tug einstaklinga stefndi ríkinu vegna eignarhalds á Hornbjargi og hafði betur. Í dóminum er vísað í frásögn Landnámu af landnámi Geirmundar heljarskinns þar sem sérstaklega var minnst á Horn. „Getur dómurinn ekki fallist á það með óbyggðanefnd að staðhættir mæli sérstaklega gegn því að Hornbjarg hafi verið numið. Er þar horft til þess að almennt verður að gera ráð fyrir því að land við sjávarsíðuna hafi verið numið frá öndverðu. Verður ekki séð að nokkuð bendi til þess að landnámsmenn hafi litið svo á að einstakir klettar eða björg hafi fallið utan landnáms síns og benda lýsingar Landnámu frekar til þess að nám hafi heilt á litið verið samfellt.“ Einnig var vísað til Jarðabókar Árna Magnússonar og Páls Vídalíns frá 1710, Jarðamats Ísafjarðarsýslu frá 1804 og Ferðabókar Þorvaldar Thoroddsens um Hornstrandir 1886 auk annarra gamalla heimilda. Dómurinn vísaði meðal annars til landamerkjabréfs Bjarnarness og aðliggjandi jarða frá því í júní 1889. Þar kom fram að Bjarnarnes væri eign Grunnavíkurhrepps. Einnig var vísað til þess að hreppurinn vildi rukka gjald af síðasta ábúanda Bjarnarness fyrir búsetu hans þar. Einnig var vísað til Jarðabókar Árna og Páls 1710 og hún túlkuð þannig að landið hafi þá þegar verið eigandalaust.

Go to News Site