Mediamax
Երեւան: Մեդիամաքս: Եվրոպայի խորհրդի մարդու իրավունքների հանձնակատար Մայքլ Օ'Ֆլահերթին Հայաստանի վարչապետին առաջարկել է ընդունել «համապարփակ հակախտրական օրենսդրություն»։ Այս մասին ասված է մարտի 30-ին Օ'Ֆլահերթիի կողմից Փաշինյանին հղված նամակում, որն այսօր հրապարակվել է Եվրոպայի խորհրդի կայքում։ Հանձնակատարը ողջունել է Հայաստանի առաջընթացը, ներառյալ նոր ոլորտային օրենսդրությունը եւ Քրեական օրենսգրքով սահմանված երաշխիքները, ինչպես նաեւ Մարդու իրավունքների պաշտպանի ակտիվ աշխատանքը։ Նշելով, որ Հայաստանի արդարադատության նախարարությունը պատրաստում է խտրականության կանխարգելման եւ դրանից պաշտպանության մասին օրենքի նախագիծը՝ Հանձնակատարը վարչապետին հորդորել է օգտագործել այս հնարավորությունը՝ ստեղծելու «համարձակ հակախտրական հիմք, որը կհամապատասխանի միջազգային չափանիշներին եւ բազմազան հասարակության կարիքներին»: Դա պետք է արվի քաղաքացիական հասարակության եւ միջազգային գործընկերների, այդ թվում՝ Եվրոպայի խորհրդի հետ խորհրդակցությունների միջոցով, ընդգծել է նա։ Մայքլ Օ'Ֆլահերթին առանձնացրել է մի քանի հարց՝ ապագա օրենքի լիակատար համապատասխանությունը Եվրոպայի խորհրդի չափանիշներին ապահովելու համար։ Մասնավորապես, ընդգծել է նա, կարեւոր է Մարդու իրավունքների պաշտպանին օժտել հստակ սահմանված լիազորություններով՝ որպես հավասարության ապահովման մարմնի՝ խտրականության դեմ արդյունավետ պայքարի եւ հավասարության խթանման համար անհրաժեշտ իրավասություններով ու ռեսուրսներով։ Օ'Ֆլահերթիի կողմից բարձրացված այլ հարցերի թվում են իրավական որոշակիության ապահովումը ԼԳԲՏԻ անձանց իրավունքների պաշտպանության գործում եւ ատելության խոսքի հետ կապված խնդիրների լուծումը:
Go to News Site