Հռոմի Պապն ասել է, որ չի վախենում Թրամփի վարչակազմից

Երեւան: Մեդիամաքս: Հռոմի Լեւոն 14-րդ Պապը հայտարարել է, որ չի վախենում ԱՄՆ նախագահ Դոնալդ Թրամփի վարչակազմից եւ մտադիր չէ բանավեճի մեջ ներքաշվել նրա հետ: ԱՄՆ ղեկավարը իր Truth Social սոցցանցում, մասնավորապես, գրել էր, որ «այս Պապը թույլ է արտաքին քաղաքականության հարցերում»:  Թրամփը նաեւ պնդել էր, որ հենց իր նախագահության շնորհիվ է Լեւոն 14-րդ Կաթոլիկ եկեղեցու առաջնորդ ընտրվել: «Ես չեմ վախենում Թրամփի վարչակազմից: Մտադիր չեմ բանավեճի մեջ մտնել նրա հետ: Ես խոսում եմ Ավետարանի մասին եւ կշարունակեմ հանդես գալ պատերազմի դեմ», - իտալական ANSA գործակալությունը մեջբերել է պոնտիֆիկոսի այս խոսքերը, որոնք նա ասել է Աֆրիկայի երկրներ կատարած այցի ընթացքում: Ապրիլի 11-ին Լեւոն 14-րդ Պապը հակապատերազմական քարոզ էր կարդացել Սուրբ Պետրոսի տաճարում: «Մահվան է հպատակվում նա, ով հեռացել է Աստծուց՝ իրեն եւ իր իշխանությունը համր, կույր ու խուլ կուռք դարձնելու համար: Բավական է երկրպագեք ինքներդ ձեզ եւ փողին: Բավական է ուժ ցուցադրել: Բավական է պատերազմել», - ասել էր Պապը:

Go to News Site