Kurir
Иран на состанокот на Правниот комитет на Меѓународната поморска организација ја отфрли иницијативата на Обединетите Арапски Емирати за воспоставување безбеден поморски коридор низ Ормуската Теснина, оценувајќи ја како правно неоснована и политички мотивирана. Иран на 113-от состанок на Правниот комитет на Меѓународната поморска организација (ИМО) во Лондон го отфрли предлогот на ОАЕ за воспоставување „безбеден поморски коридор“ низ Ормуската теснина, пренесе порталот „Press TV“. Иранскиот претставник Пурија Коливанд оцени дека предлогот е заснован на „произволни тврдења“ и правно неважечки заклучоци, со тврдење дека процедурата во рамките на ИМО е погрешна и неусогласена со правилата. Техеран наведе дека секој евентуален поморски коридор може да се воспостави само со целосна согласност на Иран како крајбрежна држава и дека без тоа таквите предлози немаат правна основа. Иран дополнително соопшти дека влошувањето на безбедносната ситуација во регионот е последица, како што тврди, на „американско-израелската воена агресија“ и дека последиците по поморскиот сообраќај не можат да се набљудуваат одвоено од тој контекст. Според иранските наводи, за време на судирот биле погодени и потопени 39 комерцијални бродови, а загинале 20 морнари во период од 40 дена. Техеран тврди дека Ормуската Теснина и понатаму е отворена за меѓународен сообраќај, но дека поминувањето подлежи на координација со иранските власти и безбедносните правила, додека се исклучени само бродовите кои Иран ги смета за непријателски. Иран во своето обраќање ги обвини САД и Израел за кршење на меѓународното право и наведе дека се работи за, како што тврди, напади кои претставуваат воени злосторства. Исто така ја критикуваше улогата на поединечни држави во регионот, вклучувајќи ги ОАЕ, поради поддршката на предлогот за коридор, со тврдење дека таквите потези би можеле дополнително да ја политизираат работата на ИМО и да ја загрозат поморската безбедност. (МИА)
Go to News Site