Telegrafi
Stacioni Policor në Rahovec ka nisur sot implementimin e një plani operativ të gjerë që synon lirimin e hapësirave publike dhe trotuareve në të gjithë zonën e saj të përgjegjësisë. Ky plan, i cili realizohet në koordinim me Komunën e Rahovecit, ka për qëllim parandalimin e shkeljeve të rregullave të trafikut dhe garantimin e lëvizjes së lirë për qytetarët. Fokusi i planit operativ Njësitet policore tashmë ndodhen në terren dhe do të ndërmarrin masa konkrete në disa pika kyçe: Parkimet e kundërligjshme: Identifikimi dhe largimi i menjëhershëm i automjeteve të parkuara mbi trotuare apo në brezin mbrojtës të rrugës. Mjetet e braktisura: Largimi i makinave të dëmtuara, të paregjistruara ose të papërdorshme që janë lënë në hapësira publike, aksion ky që realizohet në bashkëpunim me inspektorët komunalë. Pengesat nga bizneset: Lirimi i trotuareve nga mallrat e ekspozuara, tavolinat ose pajisjet e tjera të vendosura pa leje që vështirësojnë lëvizjen e këmbësorëve. Patrullime të shtuara: Rritja e prezencës policore në të gjithë zonën për të monitoruar zbatimin e këtij plani. Thirrja për qytetarët dhe bizneset Drejtoria Rajonale e Policisë në Gjakovë u ka bërë thirrje pronarëve të bizneseve dhe qytetarëve që të bashkëpunojnë dhe të respektojnë rregullat, duke shmangur uzurpimin e hapësirave të përbashkëta. Policia ka paralajmëruar se ndaj të gjithë personave që bien ndesh me ligjin do të ndërmerren masa të rrepta, duke përfshirë gjobat dhe largimin e detyrueshëm të mjeteve apo sendeve që pengojnë qarkullimin. "Siguria në trafik dhe lëvizja e lirë janë prioriteti ynë i përbashkët", thuhet në njoftimin e Stacionit Policor, duke vënë theksin te evitimi i pasojave ligjore përmes respektimit të rregullave. / Telegrafi /
Go to News Site