Mediamax
Երեւան: Մեդիամաքս: Բաքվում բացվել է նկարիչ Ալի Իսմայիլ Ալիեւի «Արեւմտյան Ադրբեջան» ցուցահանդեսը: Ադրբեջանի պետական Ազերթաջ լրատվական գործակալության հաղորդագրության մեջ, մասնավորապես, ասվում է. «Արեւմտյան Ադրբեջանի համայնքի վարչության նախագահ, պատգամավոր Ազիզ Ալեքբերլին ընդգծել է, որ Արեւմտյան Ադրբեջանի թեման հատուկ նշանակություն ունի նկարչի ստեղծագործական կյանքում, եւ նշել, որ նրա աշխատանքները մշտապես նրբորեն ու ճշգրիտ արտացոլում են այդ տարածաշրջանի մշակութային հուշարձաններն ու սովորույթները»: Մեդիամաքսը նշում է, որ հարեւան երկրի ղեկավարները «Արեւմտյան Ադրբեջան» են անվանում Հայաստանի Հանրապետության տարածքի զգալի մասը: 2025 թվականի մայիսին Ադրբեջանի նախագահ Իլհամ Ալիեւը, մասնավորապես, հայտարարել էր . «Արեւմտյան ադրբեջանցիների վերադառնալու ցանկությունը չի նշանակում տարածքային պահանջների ներկայացում Հայաստանին, որը պետք է հրաժարվի այդ ցանկությունը նման լույսի ներքո ներկայացնելու փորձերից: Այս հարցը դուրս չի մնա Ադրբեջանի օրակարգից այնքան ժամանակ, քանի դեռ վերադարձը տեղի չի ունեցել: Բնականաբար, արեւմտյան ադրբեջանցիներին, ովքեր կվերադառնան հայրենի հող, պետք է տրամադրվեն նաեւ անվտանգության երաշխիքներ»:
Go to News Site