Fréttastofa RÚV
Þorbjörg Sigríður Gunnlaugsdóttir dómsmálaráðherra segist vera að endurskoða skilyrði við veitingu ríkisborgaréttar. Hún hefur ekki á móti því að Alþingi veiti ríkisborgarétt en segist hugsi yfir framkvæmdinni. Umræða um fjármálaáætlun hélt áfram á Alþingi í dag og var komið að fagráðherrum ríkisstjórnarinnar að tala um sína málaflokka. Snorri Másson, þingmaður Miðflokksins, upplýsti í andsvörum við dómsmálaráðherra að hann ætli að leggja fram þingsályktunartillögu þar sem kveðið verði á um hert skilyrði við veitingu ríkisborgararéttar. Til að mynda að lengja búsetuskilyrði úr sjö árum í tíu, að gerðar verði ríkari kröfur um íslenskukunnáttu og að bætt verði við sérstöku samfélagsprófi. Þá á tillagan að fela í sér endurskoðun á því hvernig Alþingi stendur að veitingu ríkisborgararéttar en í þeim efnum telur Snorri að allsherjar- og menntamálanefnd, sem leggur til lista yfir einstaklinga sem veita á ríkisborgararétt, hafi á köflum farið „út fyrir allan þjófabálk.“ Verklagið umhugsunarefni en ekki verkfærið Dómsmálaráðherra svaraði því til að það trufli hana ekki að þingið hafi það verkfæri að veita ríkisborgararétt. „Ég er hins vegar hugsi yfir því hvernig verklagið er og að eitthvað sem í upphafi var frávik, þegar aðstæður voru allsérstakar og aðkallandi og nöfnin voru uppi á yfirborðinu, er núna orðið bara ofboðslega stórri og mikilli framkvæmd, jafnvel þannig að hér hafa orðið slys.“ Þorbjörg Sigríður bætti því við að hún væri að skoða hver eigi að vera skilyrði ríkisborgararéttar, meðal annars með tilliti til búsetutíma, þátttöku í samfélaginu og tungumálakunnáttu. „Ég er þeirrar skoðunar að það á ekki að vera auðvelt mál að svipta menn ríkisborgararétti. Það á heldur ekki að vera auðsótt mál að fá ríkisborgararétt. Þetta eru heilög réttindi og þau þurfa að þýða eitthvað.“
Go to News Site