Ný lög banna uppbyggingu stórra gagnavera í Maine tímabundið

Bæði fulltrúadeild og öldungadeild löggjafarþings Maine í Bandaríkjunum samþykktu í gær frumvarp til laga sem stöðvar tímabundið uppbyggingu stórra gagnavera í ríkinu. Melanie Sachs, aðalflutningsmaður frumvarpsins, segir í samtali við AFP þingið hafa með þessu brugðist við ákalli almennings og byggðarlaga sem óttast alvarleg áhrif veranna á orkukostnað, raforkukerfið sjálft og umhverfið. Sveitarfélögum verður ekki heimilt að leyfa byggingu vera sem þurfa meira en 20 megawatta orku, samkvæmt ákvæðum laganna. Hröð þróun gervigreindar hefur leitt af sér mikla þörf fyrir voldug gagnaver, sem hafa sprottið upp eins og gorkúlur víða um Bandaríkin. Milljörðum varið í uppbyggingu gagnavera Tæknifyrirtæki verja milljörðum dala í uppbyggingu gagnavera enda vilja þau öll verða leiðandi á sviði gervigreindar. Slík ver eru afar orkufrek og hafa þegar aukið álag á raforkukerfi þar sem þeim hefur verið komið upp í Bandaríkjunum og leitt af sér orkuverðshækkun fyrir almenna neytendur. Um 65 prósent eru almnennt andvíg uppbyggingu gagnavera samkvæmt niðurstöðum nýlegra skoðanakannana Quinnipiac-háskólans í Connecticut. Allri uppbyggingu orkuvera í Maine verður frestað fram í nóvember á næsta ári ef ríkisstjórinn, demókratinn Janet Mills, staðfestir lögin. Kjörnir fulltrúar í tveimur borgum í Maine höfnuðu umsókn um byggingu tveggja stórra vera á síðasta ári og sökuðu verktakana um að leyna hve mikið rafmagn og vatn þau þyrftu. Engin stór gagnaver hafa enn verið reist í ríkinu en Sachs segir nokkrar slíkar framkvæmdir í pípunum.

Go to News Site