Կառավարությունը ձեռք է բերել Արշիլ Գորկու «Անվերնագիր» աշխատանքը

Երեւան: Մեդիամաքս: Հայաստանի ազգային պատկերասրահում բացվել է «Արշիլ Գորկի. Նյու Յորք-Երեւան. նոր ձեռքբերում» ցուցահանդեսը: ՀՀ կառավարությունը միջազգային աճուրդից ձեռք է բերել աշխարհահռչակ ամերիկահայ նկարչի «Անվերնագիր» (1944 թ.) գրաֆիկական աշխատանքը։ Միջոցառմանը ներկա են գտնվել ՀՀ վարչապետ Նիկոլ Փաշինյանը, Երեւանի քաղաքապետ Տիգրան Ավինյանը, Կրթության, գիտության, մշակույթի եւ սպորտի նախարար Ժաննա Անդրեասյանը: «Մեր ժողովուրդը պատմության տարբեր էջեր է ունեցել՝ երբեմն հայկական իրականության կենտրոնը եղել է Մադրասը, երբեմն՝ Ստամբուլը, երբեմն՝ Թբիլիսին, ինչ-որ մի ժամանակ հայկական իրականության կենտրոնը եղել է Վենետիկը եւ այլն: Մենք ասում ենք, որ հայկական իրականության եւ կյանքի կենտրոնը բոլոր առումներով՝ մշակութային, գաղափարաբանական, գաղափարախոսական Հայաստանի Հանրապետությունն է», - իր ելույթում ասել է Նիկոլ Փաշինյանը: Վարչապետը նշել է, որ Արշիլ Գորկու գործը Հայաստանում հայտնվել հարկ վճարող հազարավոր քաղաքացիների շնորհիվ: Կառավարությունից հայտնում են, որ «Անվերնագիր»-ը ներկայացված է եղել Լոնդոնի Sotheby’s աճուրդային տանը: 1944 թվականի գրաֆիկական աշխատանքի (թուղթ, մատիտ, 45.4 × 55.5 սմ) աճուրդի մեկնարկային գինը կազմել է 45,000 եվրո, իսկ ակնկալվող առավելագույն գինը՝ 70,000 եվրո։ 2025 թվականի դեկտեմբերի 3-ին կայացած աճուրդի ընթացքում աշխատանքը ՀՀ կառավարությունը ձեռք է բերել 30 978 000 դրամով։

Go to News Site