„Við viljum hafa samtalið áður en stóru ákvarðanirnar eru teknar“

Magnús Þór Jónsson, formaður Kennarasambands Íslands, segir kennara hafa setið eftir með spurningar eftir að mennta- og barnamálaráðherra boðaði breytingar á einkunnakerfi grunnskóla á þingi KÍ í gær. „Vonbrigðin liggja í því að við viljum hafa samtalið áður en stóru ákvarðanirnar eru teknar,“ segir Magnús Þór. Ingu Sæland strauk kennurum öfugt þegar hún sagði að hún teldi eðlilegt að nota tölustafi í einkunnagjöf en ekki bókstafi eða önnur form sem gætu verið torskilin. „Ég veit að það er umdeilt í ykkar hópi en mér finnst það skipta máli að þetta sé í samræmi við það sem meirihluti foreldra og samfélagið vill,“ sagði Inga og vísaði þar í nýlega skoðanakönnun. „Við höfum svolítið verið að upplifa það síðustu misserin að það sé verið að taka skyndiákvarðanir þar sem er hent inn á svið sem þarf miklu lengri tíma og við þurfum miklu skýrari framtíðarsýn,“ segir Magnús Þór. Hann ræddi um málið í Morgunútvarpinu á Rás 2 fyrr í dag. Formaður Kennarasambands Íslands segir að ekki sé að því gengið að breyta einkunnakvarða grunnskólanna. Hann gagnrýnir að stjórnmálin stigi inn í menntamál með skyndiákvörðunum. „Við þurfum miklu skýrari framtíðarsýn.“ Þyrfti að taka upp samræmd próf og fall að nýju Ekki sé að því gengið að breyta einkunnakvarðanum. „Allt kennaranám í dag byggir á hugmyndafræði leiðsagnarmats og hæfniviðmiða sem svo eru metin með þessum hætti í fjögurra punkta skala á Íslandi,“ segir Magnús. Í tillögum Ingu gæti þó vel falist leið til að láta einkunnakvarða frá einum og upp í tíu ganga upp í þetta kerfi. Síðan bókstafakerfið var tekið upp hefur ýmislegt breyst sem gæti haft í för með sér að erfitt reyndist að snúa til baka. „[Áður] mátti falla en í dag fellur svo sem enginn því það er skylda hjá ríkinu að útvega skólavist til 18 ára,“ segir Magnús. „Hugmyndafræðin sem var verið að breyta verður til þess að þessi breyting verður.“ Ekki sé því hægt að snúa til baka nema með því að taka aftur upp samræmd próf og láta fólk falla, að mati hans. Vonbrigði vegna hugmyndafræðinnar Magnús segir vonbrigði gærdagsins ekki hafa snúið að því hver lending einkunnakvarða verður. „Heldur hvernig er talað um það og hvernig hugmyndafræðin er. Mér finnst það popúlískt ef skoðanakönnun hjá Maskínu hefur afgerandi áhrif á ákvörðun þar sem faglegur vettvangur hefur bent á að þetta skref sé ekki það skref sem á að vera að taka.“ Magnús segist sannfærður um að þetta sé ekki rétta leiðin. „Að stjórnmálin geti bara stigið inn og breytt og sagt „nú gerir þið bara þetta“.“ Óstöðugleiki hafi einkennt menntamál á kjörtímabilinu og nú sé við völd þriðji menntamálaráðherrann á 18 mánuðum. Magnús segir verklagið ekki einskorðast aðeins við Ingu. „Þess vegna vísa ég í ríkisstjórn Kristrúnar Frostadóttur,“ segir hann og nefnir sem dæmi afnám afminningarskyldu sem lítið samráð hafi verið átt um. Hann segir kennara þó sammála mörgu sem fram kom í kynningu menntamálaráðherra sem hafi farið um víðan völl. „Við vorum sérstaklega glöð að heyra hana tala um hópastarfið í skólum,“ segir Magnús Þór. Kennarar telji að hópar séu orðnir of stórir og breytingar geti skilað meiri árangri, einkum í yngstu bekkjunum. Þá sé fólk ánægt með hugmyndir um verknámshús í framhaldsskólum. „Það var margt í gær sem við kinkuðum kolli yfir.“

Go to News Site