Fréttastofa RÚV
„Ég var einstaklega hreinskilin og alúðleg í minni ræðu í gær enda virði ég kennarana okkar meira heldur en allar aðrar stéttir í þessu landi. Ég myndi segja að ég hafi hreinlega verið einstaklega elskuleg í gær,“ segir Inga Sæland barna- og menntamálaráðherra. Hún segir kennara og Miðstöð menntunar og skólaþjónustu (MMS) hafa vitað mætavel af fyrirhugaðri breytingu ráðherra á einkunnagjöf í grunnskólum. Ráðherra tilkynnti um breytinguna í ræðu sinni á þingi Kennarasambands Íslands í gær. Inga segir fulltrúa kennara og MSS hafa verið í spretthópi um aðferðafræði ráðuneytisins og báðir hópar því verið meðvitaðir um það sem ráðuneytið hygðist gera. „Ekki bara þar heldur víðs vegar annars staðar þar sem ég hef verið að hitta fólk að máli, þar á meðal minn kjarabaráttuforseta KÍ, hann Magnús Þór,“ segir Inga. Hann veit nákvæmlega hvert minn hugur hefur stefnt í þessum málum og þetta voru engar fréttir fyrir hann í gærmorgun, nei.“ Barna- og menntamálaráðherra segir það rangt að breytingar á einkunnagjöf í grunnskólum hafi komið flatt upp á kennara og starfsfólk Miðstöðvar menntunar og þjónustu. Hún segist vera að svara ákalli stórum hluta samfélagsins með breytingunum. Segist svara ákalli eftir breytingum Að mati Ingu gæti breytingin stuðlað að auknu gagnsæi og betri upplýsingum fyrir bæði nemendur og foreldra. Hún kveðst hafa fundið fyrir miklum vilja fyrir breytingum og vísar meðal annars til skoðanakönnunar Maskínu sem gerð var í september í fyrra. „Ég er að hlusta og ég er að bregðast við því sem ég veit að betur má fara ef mark má taka á vilja meirihluta þjóðarinnar og samfélagsins í heild sinni. Það er sjaldan sem við sjáum 88% í skoðanakönnun sem kalla eftir einhverjum ákveðnum aðgerðum stjórnvalda. Þetta er auðgert og auðstótt og mér er alveg í lófa lagið að koma til móts við það.“ Inga segir ýmis boð og bönn barna- og menntamálaráðuneytisins ekki hafa fengið hljómgrunn hjá Kennarasambandi Íslands. „Ég veit ekki til þess að stjórn KÍ undir forystu Magnúsar Þórs hafi í rauninni samþykkt eina einustu þeirra, ekki eina. Þannig að það virðist vera alveg sama hvað er reynt að gera, það eina sem virðist vera í lagi er að tæplega 50% drengjanna okkar drengjanna okkar útskrifist með lélegan lesskilning eftir tíu ára grunnskólagöngu.“ Það sé högg fyrir samfélagið í heild sinni og það komi í hennar hlut sem ráðherra að breyta menntakerfinu sem geri börnum hér á landi erfitt fyrir. „Það er ólíðandi að horfa upp á allt þetta brottfall barna og ungmenna úr námi, við erum að rústa þeirri framtíð. Ég ætla ekki að vera sá menntamálaráðherra sem heldur utan um það stýri án þess að minnsta kosti að reyna að snúa skútunni í rétta átt.“
Go to News Site