Mediamax
Երեւան: Մեդիամաքս: Ադրբեջանի նախագահի օգնական Հիքմեթ Հաջիեւը հայտարարել է, որ «հետեւողականորեն կիրառելով տարածաշրջանային առաջնորդության, նախաձեռնողականության, պատասխանատվության, համագործակցության եւ ինտեգրման սկզբունքները՝ Ադրբեջանը հասել է Հարավային Կովկասում եւ դրանից դուրս նոր աշխարհաքաղաքական իրողությունների ձեւավորմանը»։ Ինչպես հաղորդում է Ազերթաջը, Անթալիայի դիվանագիտական ֆորումում լրագրողների հետ զրույցում Հաջիեւը նշել է, որ «այդ իրողությունների շրջանակներում Հայաստանը նույնպես սկսել է հասկանալ տարածաշրջանում ձեւավորվող նոր խաղաղության օրակարգի առավելությունները»։ Ելույթ ունենալով «Տարածաշրջանի շահերի պաշտպանության դերը փոփոխվող աշխարհում» թեմայով պանելային քննարկման ժամանակ՝ Հիքմեթ Հաջիեւն ասել է, որ «Ադրբեջանի համար տարածաշրջանի շահերի պաշտպանության սկզբունքները կայանում են տարածաշրջանային մարտահրավերների եւ խնդիրների վերացման մեջ՝ մեր իսկ կողմից, տարածաշրջանի մեր գործընկերների հետ միասին»։ «Սպասելու փոխարեն, թե երբ կգան ուրիշները, մենք ինքներս պետք է հաստատենք մեր կարգը։ Սա հիմնարար հարցերից մեկն է»,- հայտարարել է Ադրբեջանի նախագահի օգնականը։ Ընդգծելով, որ թուրք-ադրբեջանական համագործակցությունը տարածաշրջանային խաղաղության եւ անվտանցության կարեւոր հիմնասյուներից է՝ Հիքմեթ Հաջիևն ասել է. «Թուրք-ադրբեջանական համագործակցությունը բարձրացել է դաշնակցային մակարդակի՝ մեր առաջնորդների կողմից Շուշիի հռչակագրի ստորագրմամբ։ Մենք դրանով չսահմանափակվեցինք։ Մենք երկկողմ համագործակցությունը վերածեցինք եռակողմ մոդելի։ Գոյություն ունի Թուրքիա-Ադրբեջան-Վրաստան համագործակցություն, Թուրքիա-Ադրբեջան-Իրան համագործակցություն, եւ մենք նաեւ ձեռք մեկնեցինք Կենտրոնական Ասիայի մեր եղբայրներին։ Մենք ստեղծել ենք գործնական համագործակցության մեխանիզմ եռակողմ կամ բազմակողմ ձեւաչափերով, եւ այն ծառայում է բոլոր կողմերի շահերին»։
Go to News Site