Fréttastofa RÚV
„Þetta verða raunverulegar samningaviðræður“, segir Costas Kadis sjávarútvegsstjóri Evrópusambandsins um mögulegar aðildarviðræður Íslands að sambandinu. Málefni hafsins voru meginefni samráðsfundar hans og Hönnu Katrínar Friðriksson atvinnuvegaráðherra í dag. Tilgangur fundarins var að styrkja aukið og víðtækara samstarf milli ESB og Íslands um ýmis atriði tengd hafinu, svo sem sjálfbærar fiskveiðar, vísindarannsóknir og verndun hafsins. Það er í samræmi við viljayfirlýsingu milli Íslands og ESB sem var undirrituð í júlí en þar er einnig stefnt að auknu samstarfi við verndun líffræðilegs fjölbreytileika og orkuskipta í sjávarútvegi og fiskeldi. Engar tvær aðildarviðræður eins Á blaðamannafundi að fundinum loknum sagði Kadis sér þykja mikið til íslenskrar sérþekkingar og frumkvöðlastarfs koma. Hann sagði ekki hægt að spá um niðurstöðu aðildarviðræðna, ef af þeim verður, eða hvort Ísland fengi þá einhverjar undanþágur í tengslum við sjávarútvegin. Hann væri þó meðvitaður um að sjávarútvegsmálin séu Íslendingum mikilvæg og sagði mörg dæmi um að tekið sé sérstakt tillit til ríkja sem sækja um aðild að sambandinu. „Ég get ekki sagt neitt um niðurstöður aðildarviðræðna. Þetta verða raunverulegar samningaviðræður en þær eru ekki hafnar aftur enn sem komið er,“ sagði Kadis. „En ég get sagt að engar tvær aðildarviðræður eru eins. Hvert og eitt ríki er dæmt út frá sínum eigin verðleikum, einkennum og aðstæðum.“ Atvinnuvegaráðherra fundaði með sjávarútvegsstjóra ESB í dag. Sjávarútvegsstóri sagðist ekki geta lofað Íslandi undanþágum í sjávarútvegi, verði það aðildarríki ESB, en sagði mörg dæmi um að tekið sé tillit til aðstæðna ríkja sem sækja um. Finnst ekki sérstakt að funda í aðdraganda þjóðaratkvæðagreiðslu Spurð hvort hún og Kadis hafi rætt hvort til greina komi að Ísland fengi einhverjar undanþágur í aðildarviðræðum svarar Hanna Katrín neitandi. „Ég þurfti ekkert að spyrja hann sérstaklega um það, við erum bara meðvituð um það að komi til þess að íslenska þjóðin kjósi að athuga hvað kæmi út úr samningaviðræðum þá eru það samningaviðræður sem myndu byrja og út úr þeim kemur eitthvað. Það á við um þessar samningaviðræður eins og allar aðrar, menn byrja með autt blað og einhver samningsmarkmið og svo reyna menn að ná sínu fram.“ Er ekkert sérstakt að funda með sjávarútvegsstjóra Evrópusambandsins í aðdraganda þjóðaratkvæðagreiðslunnar? „Mér finnst það alveg frábært. Eins og ég segi þessi fundur er til kominn bara sem afleiðing af þessari viljayfirlýsingu, sem ég vel að merkja erfi hálfkláraða frá frá fyrri ráðherra og fyrri ríkisstjórn. En auðvitað er það svo að þrátt fyrir að þessi mikilvæga þjóðaratkvæðagreiðsla í lok ágúst hafi ekki verið á formlegri dagskrá fundar og hafi alls ekki verið rædd á fundinum, þá áttum við nú gott samtal í gærkvöldi um alls konar hluti og þar með talið þetta.“
Go to News Site