Վենետիկում բացվել է Ավետիք Իսահակյանի հուշատախտակը

Երեւան: Մեդիամաքս: Ավետիք Իսահակյանի 150-ամյակի հոբելյանական միջոցառումների շրջանակում Վենետիկի Դորսոդուրո N2266 հասցեում բացվել է Վարպետի հուշատախտակը։ Միջոցառումն իրականություն է դարձել ԿԳՄՍ եւ Արտաքին գործերի նախարարությունների համատեղ ջանքերով՝ Վենետիկի հյուպատոսարանի աջակցությամբ, Ավետիք Իսահակյանի տուն-թանգարանի եւ Վենետիկի հյուպատոսարանի կազմակերպմամբ: ԿԳՄՍ նախարարի տեղակալ Ալֆրեդ Քոչարյանն ասել է. «Մեծ պատիվ է այսօր գտնվել Վենետիկում՝ մի քաղաքում, որը դարեր շարունակ եղել է մշակույթների, գաղափարների եւ ժողովուրդների հանդիպման վայր։ Այսօր այստեղ հավաքվել ենք՝ արժեւորելու հայ մեծ բանաստեղծ Ավետիք Իսահակյանի հիշատակը եւ բացելու հուշատախտակ այն տանը, որտեղ նա ապրել է»: Նա հիշեցրել է, որ 2025թ. մարտին Գերմանիայի Լայպցիգ քաղաքում եւս բացվել էր գրողի հուշատախտակը: Հուշատախտակը խորհրդանշում է երկու երկրների միջեւ մշակութային երկխոսությունը։ Հուշատախտակի վրա ուրվագծվում է Ռիալտոյի կամուրջը, որը Ավետիք Իսահակյանի լավագույն բանաստեղծություններից մեկի խորհրդանիշն է, եւ Վարպետի սիրելի ճարտարապետական կառույցներից մեկի՝ Երերույքի տաճարի զարդանախշը։ Հուշատախտակի վրա եղած QR կոդով այցելուները կարող են դիտել «Իսահակյանը եւ Վենետիկը» տեսանյութը։ Հուշատախտակի ճարտարապետը Հայկ Ասատրյանն է։ Այս տանը, որտեղ տեղադրվում է հուշատախտակը, Վարպետն ընտանիքով ապրել եւ ստեղծագործել է 6 տարի՝ 1921-1926 թթ.։ Իսահակյանի որդու՝ Վիգեն Իսահակյանի հուշերում գրված է. «Դորսոդուրո փողոցում գտնվող այս տունը` N 2266, որտեղ ապրեցինք վեց տարի, պարտեզով շրջապատված մի հին առանձնատուն էր, որը Վենետիկի համար հազվագյուտ բան էր: Պատկանում էր հինավուրց վենետիկյան Դե Մարքիների ազնվական ընտանիքին։ Հորս աշխատասենյակը երկրորդ հարկում էր, նայում էր պարտեզին: Աղավնիները գալիս էին, նստում պատուհանի եզրին եւ ղունղունում, ուտելիք պահանջում»։ Այս տանը Ավետիք Իսահակյանը հյուրընկալել է Մարտիրոս Սարյանին ու Եղիշե Չարենցին։

Go to News Site