Ազատություն
Հայաստանի Ազգային ժողովի նախագահ Ալեն Սիմոնյանը Ստամբուլում հանդիպել է Պոլսո Հայոց պատրիարք Սահակ արքեպիսկոպոս Մաշալյանի հետ: Պոլսո Հայոց պատրիարքարանի փոխանցմամբ՝ Սահակ արքեպիսկոպոս Մաշալյանը մտահոգություն է հայտնել վերջին մեկ տարվա ընթացքում եկեղեցի-իշխանություն «անօգուտ առճակատումների» առնչությամբ: «Պատրիարքը մաղթեց, որ մօտ ապագային վերջ կը գտնէ անօգուտ ձգտեալ կացութիւնը եւ կը վերահաստատուի հաշտութիւնն եւ համերաշխութիւնը Մայր Աթոռ Սուրբ Էջմիածնի եւ Հայաստանի Հանրապետութեան Կառավարութեան միջեւ», - ասված է Պոլսո Հայոց պատրիարքության տարածած հաղորդագրությունում: Սահակ արքեպիսկոպոս Մաշալյանն ընդգծել է Թուրքիայի և Հայաստանի միջև հարաբերությունների զարգացման սահուն ընթացքն ապահովելու կարևորությունը, ապագայում դիվանագիտական հարաբերությունների հաստատումն ու ամրապնդումը: Ալեն Սիմոնյանը Ստամբուլ էր մեկնել՝ մասնակցելու Միջխորհրդարանական միության 152-րդ վեհաժողովին:
Go to News Site