Kajgana
Трамп: Американските маринци запленија ирански брод во Ормускиот Проток Филип Здравески 20.04.2026 / 08:55 Свет Американските маринци пресретнаа и заробија товарен брод под иранско знаме, кој се обидуваше да ја пробие блокадата на САД, објави американскиот претседател Доналд Трамп. Иран тврди дека САД не го заплениле неговиот брод. Преговори во Пакистан Инцидентот се случи откако Трамп објави дека американска делегација ќе пристигне во Пакистан во понеделник вечерта за понатамошни разговори, иако Техеран не потврди дека ќе учествува. Бродот беше предупреден да застане во Оманскиот Залив и откако одби, Морнарицата го запре со дупчење дупка во неговата машинска просторија, напиша Трамп на својата мрежа Truth Social, велејќи дека „Touska“ е во „заробеништво“ на САД. „Иранскиот екипаж не сакаше да послуша, па нашиот брод ги запре со дупчење дупка во неговата машинска просторија“, рече Трамп. Додаде дека бродот е под санкции на Министерството за финансии на САД „поради историја на нелегални активности“ и дека маринците „проверуваат што има на бродот“. Централната команда на САД (CENTCOM) објави на платформата X дека американските сили во Арапското Море спровеле мерки за поморска блокада против товарен брод под иранско знаме кој пловел кон иранско пристаниште. Тие наведуваат дека бродот добил повеќекратни предупредувања во период од шест часа, но екипажот не ги почитувал наредбите, по што бродот бил отворен со оган. „Американските сили издадоа повеќекратни предупредувања и го информираа бродот дека ја крши блокадата на САД. Откако екипажот на Touska не ги почитуваше повторените предупредувања во период од 6 часа, разорувачот USS Spruance нареди евакуација на машинската просторија, а потоа го оневозможи погонот на бродот пукајќи во машинската просторија“, се вели во соопштението. https://t.co/SdInnL4ZW8 — U.S. Central Command (@CENTCOM) April 19, 2026 Се додава дека американските маринци од 31-та експедициска сила потоа се качиле на бродот, кој останува под контрола на САД. Оваа верзија на настаните се разликува од онаа што ја презентираа иранските медиуми, според кои иранските воени бродови возвратиле оган врз американските сили и ги принудиле да се повлечат. Ирански медиуми: Спречивме обид на САД да го запленат нашиот брод Полуофицијалната иранска новинска агенција مهر (Мехр) објави верзија за инцидентот во Оманското Море што се разликува од тврдењата на американскиот претседател Доналд Трамп за запленување на ирански брод. Важно е да се напомене дека во соопштението не е наведено за кој брод станува збор. „Американските терористички сили распоредени во водите околу Оманското Море отворија оган врз ирански трговски брод за да го принудат да се врати во иранските територијални води“, се вели во соопштението. „Сепак, благодарение на навремената реакција на поморските сили на Револуционерната гарда кои го поддржаа иранскиот брод, Американците беа принудени да се повлечат и да ја напуштат областа“, се додава во него. Иран негира разговори Претходно во неделата, Трамп изјави дека неговите претставници ќе бидат во Пакистан во понеделник на разговори за војната со Иран. „Нудиме многу фер и разумен договор и се надевам дека ќе го прифатат, бидејќи ако не го сторат тоа, САД ќе ги уништат сите електрани, сите мостови во Иран“, напиша Трамп. „НЕМА ПОВЕЌЕ ДОБРИ МОМЦИ!“ Сепак, иранските државни медиуми тврдат дека извештаите за нови разговори со САД во Пакистан „не се вистинити“, иако ниту еден официјален претставник сè уште не го разјаснил ставот на Техеран. Иранската новинска агенција објави, без да наведе извор, дека Иран ги отфрлил разговорите. „Иран објавува дека неговото непојавување на втората рунда разговори произлегува од она што го смета за прекумерни барања на Вашингтон, нереални очекувања, постојани промени во позицијата и сегашната поморска блокада, која ја смета за кршење на прекинот на огнот“, објави ایرنا (ИРНА). САД Иран Ормуски Проток Автор/Извор Макфакс Прикажи во метро On
Go to News Site