Fréttastofa RÚV
Samfylkingin og Sjálfstæðisflokkurinn bæta við sig fylgi milli mánaða samkvæmt nýrri könnun Maskínu, sem nær til stjórnmálaflokka á landsvísu. Greint var frá niðurstöðum hennar á vef Vísis í kvöld. Samfylkingin mælist með mest fylgi, 27,7%. Næststærstur mælist Sjálfstæðisflokkurinn með 18,1%. Sjálfstæðisflokkurinn hefur greinilega verið að sækja í sig veðrið og mælist nú með meira fylgi en hann hefur gert í könnunum Maskínu síðan í september í fyrra, en fylgi hans hefur mælst á bilinu 13,5-16,2% síðan í októbermánuði. Til samanburðar hefur fylgi Samfylkingarinnar mælst á bilinu 25,5-29,4% á sama tímabili. Fylgi Miðflokksins tapar tveimur prósentustigum á milli mánaða og mælist 16,4%. Viðreisn tapar einnig fylgi og mælist með 12,8% í stað 14% í mars. Lítil hreyfing er á stuðningi við aðra flokka sem mælast allir með minna en tíu prósent fylgi. Framsóknarflokkurinn mælist með 7,7%, Flokkur fólksins með 5,8%, Sósíalistaflokkurinn með 3% og Píratar með 4,7%. Minnst er fylgi Vinstri grænna, 4,3%. Könnun Maskínu var framkvæmd á milli 25. og 31. mars og á milli 8. og 16. apríl. 1.786 svarendur tóku afstöðu. Þar af voru 91,4% sem sögðust fylgjandi ákveðnum flokki og 3,2% sögðust myndu skila auðu. 1,3% sögðust ekki munu kjósa og 4,1% vildu ekki gefa upp afstöðu sína.
Go to News Site