Mediamax
Երեւան: Մեդիամաքս: Հայաստանի վարչապետ Նիկոլ Փաշինյանն ասել է, որ Հայաստանում կայանալիք ընտրությունների արդյունքներով «պատմաքաղաքական հեղափոխություն է սպասվում»: Արմենպրեսի փոխանցմամբ , «Քաղաքացիական պայմանագիր» կուսակցության նախընտրական ծրագիրը ներկայացնելիս վարչապետն ասել է, որ «Իրական Հայաստանի» գաղափարախոսությունը ընկալվում է Հայաստանի ժողովրդի կողմից «Եթե այն Հայաստանի ժողովրդի կողմից ընկալված չլիներ, ես այսօր վարչապետ չէի լինի: 2024 թվականին, եթե չեմ սխալվում, ասել եմ, որ ես՝ որպես Հայաստանի վարչապետ, որոշում եմ կայացնում, որ մենք Ղարաբաղի շարժումը չենք շարունակում, իսկ եթե ժողովուրդը համաձայն չէ այս որոշման հետ, կոչ եմ անում ժողովրդին դուրս գալ, հեղափոխություն անել եւ զրկել ինձ Հայաստանի վարչապետի պաշտոնից։ Առաջիկա ընտրություններում էլ այդ հնարավորությունը Հայաստանի քաղաքացիները ունեն։ Բայց Հայաստանի քաղաքացիները նաեւ ունեն այդ պատմաքաղաքական հեղափոխությունը իրականացնելու հնարավորությունը, երբ մենք կենտրոնանում ենք մեր ինքնիշխան պետության շահերի վրա եւ գործում ենք բացառապես Հայաստանի քաղաքացիների անվտանգության, բարեկեցության, խաղաղության շահերի համար: Դա պատմական ընտրություն է, որովհետեւ վերջին հարյուրամյակներում առաջին անգամ մենք ունենք հնարավորություն, որ ոչ թե մեր շահերը արտապատվիրակենք ուրիշներին»,- ասել Նիկոլ Փաշինյանը։
Go to News Site