Mediamax
Երեւան: Մեդիամաքս: Այսօր տեղեկություններ են հայտնվել այն մասին, որ Ադրբեջանի իշխանությունները հողին են հավասարեցրել Ստեփանակերտի Սուրբ Աստվածածին առաջնորդանիստ եկեղեցին: Եկեղեցին օծվել էր 2019 թվականի ապրիլի 7-ին` Սուրբ Աստվածածնի ավետման տոնին՝ Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսի հանդիսապետությամբ: Արարողությանը ներկա էին Արցախի նախագահ Բակո Սահակյանը, ԼՂՀ Ազգային Ժողովի նախագահ Աշոտ Ղուլյանը, Արցախի թեմի հոգեւոր սպասավորներ, Արցախի եւ Հայաստանի Հանրապետության իշխանությունների ներկայացուցիչներ, մասնավորապես, Հայաստանի Ազգային անվտանգության ծառայության տնօրեն Արթուր Վանեցյանը: «Արցախի գողտրիկ երկրամասում վեր խոյացած հայոց հավատի նոր վկայարանի հիմնարկեքը Մենք կատարեցինք 2006 թվականին՝ հավատով, որ Աստված միշտ մեզ հետ է եւ ձեռքբերումներ ու հաղթանակներ է պարգեւում մեր պայքարների ու մեր բոլոր բարի ձգտումների մեջ: Մեր ժողովրդի զավակաց ջանքերով վեր խոյացած այս եկեղեցին Աստծո օրհնությամբ ու շնորհով նոր ղողանջը պիտի դառնա մեր հավատքի ու հաղթական ոգու, նաեւ՝ ազդարարողը Արցախի մեր ժողովրդի ազատ ու անկախ կյանքի անօտարելի իրավունքի, ինչպես եւ վկայությունը մեր քրիստոնեական հավատի եւ ազգային ինքնության անխորտակելի շաղկապվածության», - իր խոսքում ասել էր Գարեգին Երկրորդը: Նա իր առանձնակի գնահատանքն էր հայտնել եկեղեցու կառուցման հիմնական բարերարներ Միքայել եւ Կարեն Վարդանյաններին` նրանց արժանացնելով Հայաստանյայց Առաքելական Սուրբ Եկեղեցու «Սուրբ Գրիգոր Լուսավորիչ» պատվո բարձրագույն շքանշանին:
Go to News Site