Fréttastofa RÚV
Mikil umfjöllun í fjölmiðlum og alvarleiki brots skýrir hörð viðbrögð við dómi yfir manni fyrir húsbrot og kynferðislega áreitni gegn barni segir afbrotafræðingur. Helgi Bjartur Þorvarðarson hlaut í síðustu viku tólf mánaða fangelsisdóm fyrir brotið, þar af níu skilorðsbundna. Margrét Valdimarsdóttir, dósent í félags- og afbrotafræði við Háskóla Íslands, segir að þrátt fyrir að breytingar hafi verið gerðar á hegningarlögum með tilliti til kynferðisbrota gegn börnum, sýni þessi dómur að enn sé bil milli réttarvitundar almennings og dóma sem falla í slíkum málum. „Ég held það séu ýmsir þættir sem skýra þessi viðbrögð við þessum dómi, Málið hefur hlotið mikla umfjöllun í fjölmiðlum og það er einmitt í þeim málum þar sem fólk er búið að fá svona ýmsar lýsingar og upplifir reiði þegar svo dómur fellur sem er talinn mildur,“ segir Margrét „En svo er líka annað að málið er einstaklega alvarlegt. Þarna er brotist inn á heimili barns sem á að upplifa sig öruggt og brotið á því.“ Meðal þess sem vakið hefur hneykslan er að í dómnum segir að fara þurfi varlega í að draga ályktanir út frá framburði barnsins. Margrét segir að í þessu máli eins og öðrum sakamálum hvíli sönnunarbyrðin á ákæruvaldinu um að sanna sekt, og vafaatriði séu túlkuð ákærða í vil. Ekki sé hægt að slaka á þeim kröfum þó barn eigi í hlut. „Svo er sérstaklega tekið fram að í einhverjum tilfellum staðfesti tæknileg gögn ekki frásögn brotaþola og það séu einhverjar mótsagnir. Það er einmitt þess vegna sem ákærði er sýknaður um alvarlegasta brotið þ.e. nauðgun en hann er svo sakfelldur fyrir húsbrot og kynferðislega áreitni,“ segir Margrét. „En kynferðisleg áreitni gegn barni er auðvitað alvarlegt mál og refsiramminn fyrir slíkt brot er fangelsi allt að sex árum, en dómurinn endar þarna í einu ári og níu mánuðir af því eru skilorðsbundin sem ég held að sé einmitt einnig ástæðan fyrir því að mörgum blöskri, að eftir að dómur fellur þá hefur dómþoli eða sá ákærði lokið við fangelsisvist.“
Go to News Site