ឃាត់រថយន្តសាំយ៉ុង១គ្រឿង ដឹកឈើពីខេត្តព្រះវិហារ ឆ្ពោះទៅខេត្តកំពង់ធំ

ខេត្តព្រះវិហារ៖ រថយន្តសាំយ៉ុង១គ្រឿង បានដឹកឈើអារពេញ បោះពួយចេញពីខេត្ត​ព្រះ​វិហារ ទីកំពុងកក្រើករឿងកាប់បំផ្លាញព្រៃឈើធម្មជាតិ ឆ្ពោះទៅកាន់ខេត្ត កំពង់ធំ ត្រូវបាន​មន្ត្រីឧទ្យានុរក្សដែនជម្រកព្រៃឡង់ស្ទាក់ចាប់។  ការស្ទាក់ចាប់ថយន្តដឹកឈើនេះ ធ្វើឡើងនៅព្រឹកថ្ងៃទី ២២ ខែមេសា ឆ្នាំ២០២៦នេះ នៅ​ចំណុច​ឃុំរមទម ស្រុករវៀង ខេត្តព្រះវិហារ។ សូមបញ្ជាក់ថា ក្នុងរយៈពេលប៉ុន្មានថ្ងៃនេះ កំពុងផ្ទុះការចាប់អារម្មណ៍រឿងកាប់បំផ្លាញ​ព្រៃ​ឈើនៅសហគមព្រៃរកា ក្នុងស្រុកជាំក្សាន្ត ខេត្តព្រះវិហារ។ ឈើធំៗជាច្រើនដើម ត្រូវបានជនខិលខូចលួចកាប់រំលំ។ ប្រជាសហគមបានសម្តែងក្តីព្រួយបារម្ភពីការហិនហោចព្រៃឈើ ដែលនៅសេសសល់​នាពេល​បច្ចុប្បន្ន។ ក្រោយផ្ទុះរឿងកាប់បំផ្លាញព្រៃឈើនេះ មន្ត្រីឧទ្យានុរក្សក៏កំពុង​សស្រាក់​សស្រាំក្នុងការទប់ស្កាត់បទល្មើសនេះផងដែរ។ ការទប់ស្កាត់បទល្មើសបំផ្លាញព្រៃឈើ បើទោះបីមន្ត្រីឧទ្យានុរក្សមានចំនួនតិច ព្រៃឈើ​ធំ​យ៉ាងណាក្តី តែមានការលើកឡើងថា ការទប់ស្កាត់បទល្មើសមិនលំបាកទេ បើមាន​ឆន្ទៈ​ប្រាកដក្នុងការបង្ក្រាប។ មិនលំបាកព្រោះថា ឈើដែលកាប់ពីព្រៃ មិនចេះ​បំបាំង​កាយ ជ្រែក​ដី ឬហោះលើអាកាសនោះទេ ពោលចាំស្ទាក់តែផ្លូវចេញពីព្រៃ ដោយមិនឱ្យគេដឹក​ចេញ​ទៅជាការស្រេចទៅហើយ។ ផ្លូវដឹកឈើចេញពីព្រៃមិនមានច្រើននោះទេ ដូច្នេះដាក់តែកម្លាំងស្ទាក់កុំឱ្យពួកគេដឹកចេញរួចទៅជាការស្រេចហើយ៕

Go to News Site