Kajgana
64-годишниот резервен голман на Охрид го збуни Flashscore КУП НА МАКЕДОНИЈА 2025/2026 Филип Здравески 22.04.2026 / 15:18 Фудбал Не е грешка во насловот, навистина екипата на Охрид Лихнидос сезонава на клупа го има 64-годишниот резервен голман Благојчо Буџакоски. Буџакоски (прв од десно); Фото: ГФК Охрид Лихнидос Бидејќи најпознатата апликација за резултати во живо, Flashscore, позната и како Rezultati, не објавува состави од македонската втора лига, се најде сега во небрано кога второлигашот Охрид Лихнидос играше полуфинале од Купот на Македонија. Во составот на Охрид цела сезона на клупата е Благојчо Буџакоски, кој има 64 години и е пријавен како голман. Се најде меѓу резервите и на денешното куп полуфинале против Силекс кое заврши 1:1, па патникот во финалето ќе се решава на реваншот во Кратово. И тука настанува проблем. Веројатно на никој во Flashscore не му се верувало дека резервниот голман има 64 години, па ставиле дека има 33 години, но и дека не е голман туку играч од средниот ред. Составите од мечот Охрид Лихнидос - Силекс на Rezultati можете да ги погледнете тука . Да биде оваа приказна уште поурнебесна, му ставиле и фотографија од сосем друг играч, извесен германски фудбалер Антон Хајнц, напаѓач на резервниот тим на минхенски Баерн. Профилот на Хајнц на Transfermarkt можете да го погледнете тука . Инаку, добрите познавачи на македонскиот фудбал претпоставуваат дека 64-годишниот Благојчо е всушност дел од тренерскиот стручен штаб на Охрид, но нема лиценца, па за да може да биде на клупата е пријавен како голман, а тоа е дозволено бидејќи за играч не постои возрасна граница. Тоа е само претпоставка, можеби вистинската функција му е сосем друга. Сезонава уште од првото второлигашко коло бил меѓу резервите на Охрид, вкупно 20 натпревари плус 3 во Купот на Македонија. Ги пропуштил колата од 17 до 20 од, за нас, непознати причини. Нормално, ниту еднаш не влегол во игра. Бидејќи реномираниот Transfermarkt ги евидентира и натпреварите од Купот на Македонија, Буџакоски има и свој профил на оваа веб-страница. Неговиот профил можете да го погледнете тука . ФК Охрид Куп на Македонија Автор/Извор Филип Здравески Прикажи во метро On
Go to News Site