Fréttastofa RÚV
Kostnaður við vetrarþjónustu á Víkurskarði lækkaði úr rúmum 27 milljónum króna árið 2021 niður í rúmar 13 milljónir árið 2024, þrátt fyrir að bílaumferð um veginn á vetrardögum hafi aukist um tæp 57 prósent á þessum þremur árum. Þetta kemur fram í svari innviðaráðherra við fyrirspurn Ingvars Þóroddssonar, þingmanns Viðreisnar. Í vetrarþjónustu felast hálkuvarnir og snjómokstur. Heimir Gunnarsson, deildarstjóri hjá Vegagerðinni segir í samtali við fréttastofu að það hafi verið meðvituð ákvörðun að keppast ekki við að halda veginum opnum þegar hægt er að velja aðra leið, Vaðlaheiðargöng. Skynsamlegra sé að setja fé í önnur og brýnni verkefni. Vegagerðin skýrir fjölgun bíla yfir Víkurskarðið að vetri með fjölgun ferðamanna sem forðast gjaldskylduna í Vaðlaheiðargöngum. Jafnframt er varaleið um Dalsmynni við Fnjóskárdal ef eitthvað bregður út af.
Go to News Site