Mediamax
Երեւան: Մեդիամաքս: Ադրբեջանի նախագահ Իլհամ Ալիեւը հայտարարել է, որ «խաղաղ գործընթացում մեծ դրական դինամիկա է նկատվում»: «Մեր երկրների միջեւ խաղաղությունը փաստացի հաստատվել է անցյալ տարվա օգոստոսից, երբ նախագահ Թրամփը երկու երկրներին հրավիրել էր Սպիտակ տուն, որտեղ մենք ստորագրեցինք Համատեղ հռչակագիրը, իսկ խաղաղության համաձայնագրի նախնական տեքստը նախաստորագրվեց արտաքին գործերի նախարարների կողմից: Այդ ժամանակից ի վեր խաղաղ գործընթացում նկատվում է մեծ դրական դինամիկա, ներառյալ առեւտրային հարաբերությունների մեկնարկը, մասնավորապես՝ Ադրբեջանից Հայաստան նավթամթերքի մատակարարումները, քաղաքացիական հասարակության եւ ԶԼՄ-ների ներկայացուցիչների հանդիպումները, ինչը նույնպես նպաստում է բնականոն մթնոլորտի ձեւավորմանը երկրների միջեւ, որոնք երկար տարիներ գտնվել են պատերազմական վիճակում: Սրանք օրինակներ են, որոնք ցույց են տալիս, որ զարգացումը սահմանում են միայն քաղաքական կամքը, քաղաքական իմաստությունն ու ապագայի ռազմավարական տեսլականը: Կամ դուք անվերջ շարունակում եք պատերազմը կամ պատերազմները, կամ կանգ եք առնում այն պահին, երբ հասել եք ցանկալիին՝ միջազգային իրավունքի հիման վրա՝ դրսեւորելով խաղաղության պատրաստակամություն: Կարծում եմ՝ այս օրինակը կարող է կարեւոր լինել այն երկրների համար, որոնք մինչ օրս գտնվում են պատերազմական վիճակում»,- ասել է Ալիեւը ապրիլի 22-ին Բաքվում Լատվիայի նախագահի հետ հանդիպման արդյունքներով մամուլի համար արված հայտարարության մեջ:
Go to News Site