Mediamax
Yandex Armenia-ն ամփոփել է ընկերության «Օգնենք միասին» բարեգործական ծրագրի արդյունքները՝ ազդարարելով դրա նոր՝ կրթական փուլի մեկնարկը։ 1.5 տարվա ընթացքում «Օգնենք միասին» նախաձեռնությունը միավորել է օգտատերերի եւ ընկերության ջանքերն՝ ի աջակցություն բարեգործական կազմակերպությունների։ Այս փուլում որոշվել է ուշադրությունը կենտրոնացնել կրթության ոլորտի վրա, եւ այդ նպատակով Yandex Armenia-ն կազմակերպել է «Օգնենք միասին՝ փոխելով կյանքեր կրթությամբ» հանրային քննարկումը։ Դրան մասնակցել են նախաձեռնության շահառու երեք կազմակերպության՝ «Դասավանդիր հանուն Հայաստանի» կրթական հիմնադրամի, «Հույսի կամուրջ» հասարակական կազմակերպության եւ «Հայաստանի մանուկներ» բարեգործական հիմնադրամի ներկայացուցիչները։ Այն վարել է «Այբ» հիմնադրամի հոգաբարձուների խորհրդի նախագահ, ուսուցիչ Արամ Փախչանյանը։ Մեդիամաքսն առանձնացրել է քննարկման հետաքրքիր դրվագներն ու «Օգնենք միասին» նախաձեռնության առաջին փուլի արդյունքները։ «Վերջին երկու տարվա ընթացքում մեր բոլոր բարեգործական ծրագրերին ուղղվել է շուրջ 126 միլիոն դրամ» Արամ Մխիթարյան, Yandex Armenia ընկերության ղեկավար Որպես Հայաստանում գործող ընկերություն՝ միշտ փորձել ենք մեր հիմնական բիզնես ուղղություններից բացի, զարգացնել նաեւ սոցիալական պատասխանատվության բաղադրիչը։ Կարելի է ասել՝ գործունեության առաջին իսկ օրերից ներգրավված ենք եղել թե՛ կրթական, թե՛ բարեգործական ծրագրերում։ Դեռ 2017 թվականին Yandex Armenia-ն Վանաձորում եւ Գյումրիում գործարկել է ծրագրավորման դպրոցներ, որոնք այս տարիների ընթացքում տվել են շուրջ 500 շրջանավարտ։ Ուսուցումն ամբողջությամբ ֆինանսավորվում է ընկերության կողմից, իսկ դասավանդում ենք ներկայում մեծ պահանջարկ ունեցող Python ծրագրավորման լեզուն։ Խոսելով սոցիալական նախաձեռնությունների մասին՝ չեմ կարող չանդրադառնալ «Օգնենք միասին» ծրագրին, որն ունի հետաքրքիր մեխանիզմ։ Այն հնարավորություն է տալիս մեզ՝ որպես բիզնեսի, եւ մեր օգտատերերին՝ որպես պատասխանատու քաղաքացիների, իրենց ներդրումն ունենալ եւ աջակցել մեզ հետ համագործակցող հիմնադրամներին։ Վերջին երկու տարվա ընթացքում մեր բոլոր բարեգործական ծրագրերին ուղղվել է շուրջ 126 միլիոն դրամ։ Ձգտում ենք զարգացնել բիզնեսն այնպես, որ մեր ծառայությունները հասանելի լինեն հնարավորինս շատ մարդկանց: Մեր գործունեության ուղղություններից մեկը ոչ կանոնավոր ուղեւորափոխադրումների ծառայությունն է, սակայն դրանից բացի, փորձում ենք նպաստել նաեւ հանրային տրանսպորտի զարգացմանը՝ ավելի լայն հանրության համար հասանելի ծառայություններ ապահովելու նպատակով։ Ինչ վերաբերում է բնապահպանական ուղղությանը, զգալի աշխատանք ենք կատարել էլեկտրական մեքենաների թվի ավելացման համար՝ ստեղծելով նաեւ հատուկ սակագին։ Մեզ համար կարեւոր է հատուկ կարիքներ ունեցող մարդկանց ներգրավվածությունը։ Օրինակ՝ մեր հարթակը հնարավորություն է տալիս խուլ և լսողության խնդիրներ անձանց աշխատել համակարգում, եւ 2024 թվականի հունիսից այդ վարորդներն իրականացրել են մոտ 55 հազար ուղեւորություն։ Մեր ութ ծառայություն հարմարեցված է տեսողական խնդիրներ ունեցող օգտատերերի համար։ Իսկ, օրինակ, ուղեւորություն պատվիրելիս օգտատերը կարող է նշել, եթե ունի հատուկ կարիքներ՝ ստանալով համապատասխան ծառայություն։ «Կարեւոր է, երբ բիզնեսն աջակցում է հանրային նշանակության հարցերի լուծմանը» Սական Պողոսյան, «Հայ մայրեր» բարեգործական հասարակական կազմակերպության ղեկավար Մեր կազմակերպությունը Yandex Armenia-ի «Օգնենք միասին» նախաձեռնությանը միացել է ամենասկզբում։ Այս 1,5 տարվա ընթացքում կարողացել ենք հաշմանդամություն ունեցող երեխաներին ոչ միայն տրամադրել անվճար վերականգնողական բուժում, այլեւ՝ ծրագրի շրջանակում մեր երկու «Երազի տուն» վերականգնողական կենտրոնում հիմնադրել սենսորային սենյակներ, որոնք շատ կարեւոր են։ Բացի այդ, այս ժամանակահատվածում ավելացրել ենք մեր կենտրոնների նյութատեխնիկական հագեցվածությունը։ Շատ կարեւոր է, որ Yandex Armenia ընկերությունն ունի բարձր սոցիալական պատասխանատվություն եւ կարողանում է աջակցել հասարակական կազմակերպություններին։ Այս դիրքորոշումը ցույց է տալիս, որ բիզնեսը կարող է աջակցել հանրային նշանակության հարցերի լուծմանը։ «Այսօր ավելի քան 13 հազար մարդ միացել է «Օգնենք միասին» նախագծին» Մարիա Տիմոֆեեւա, Yandex Armenia-ի սոցիալական ծրագրերի ղեկավար «Օգնենք միասին» նախագծին միանալու համար պետք չեն մեծ ջանքեր: Կարող եք պարզապես բացել Yandex-ի հավելվածը, ընտրել նվիրատվության գումարի չափը, որը մեծ չէ, կարող է լինել 10, 20 կամ 50 դրամ։ Հետագայում՝ առաքման կամ մեքենայի պատվերի դեպքում, ձեր անունից այդ գումարը փոխանցվելու է «Օգնենք միասին»-ին, որն էլ իր հերթին գումարն ուղղելու է ծրագրի հետ համագործակցող գործընկեր կազմակերպություններին: Այսօր արդեն նախագծի միջոցով ավելի քան 60 մլն դրամ է ուղղվել մի շարք հիմնադրամների։ Այս աջակցության թիրախում մեծամասամբ երեխաներն են։ Ընդհանուր միջոցների 25 տոկոսն ուղղվել է մանկական քաղցկեղի բուժմանը, 20-ը՝ մանկական ուղեղային կաթվածով երեխաների զարգացմանը, 37-ն ուղղվել է դժվար իրավիճակում հայտնված ընտանիքների աջակցությանը, 16 տոկոսն՝ աուտիզմով երեխաների աջակցությանը եւ 2 տոկոսը՝ հիմնադրամների զարգացմանը։ Ցանկանում եմ մի քանի հետաքրքիր թիվ ներկայացնել. 50 դրամն ուղեւորության ժամանակ նվիրատվության ամենատարածված գումարն է, «ամենաառատաձեռն» օրը կարողացել ենք հավաքել 63 հազար դրամ, այսօր ավելի քան 13 հազար մարդ միացել է «Օգնենք միասին» նախագծին եւ բարեգործության բաղադրիչով արդեն իսկ իրականացվել է ավելի քան 580 հազար պատվեր: Yandex-ը մշտապես փորձում է աջակցել մարդկային ներուժի զարգացմանը եւ այս ուղղությամբ մտածելիս առաջին հերթին հիշում ենք մեր երեխաներին. ինչպե՞ս են զգալու իրենց ամեն օր փոփոխվող աշխարհում: Կարծում եմ՝ յուրաքանչյուրը կհամաձայնի, որ կրթությունն ու միջավայրը երկու կարեւոր գործոն են, որոնք ազդում են երեխայի հետագա ընտրությունների վրա: Այնպես որ, ուրախ եմ ներկայացնել նոր կազմակերպությունների, որոնց հետ շարունակելու ենք աշխատանքն «Օգնենք միասին» ծրագրի շրջանակում՝ ուղղելով մեր հայացքը դեպի կրթություն. «Հույսի կամուրջ» կազմակերպություն, «Դասավանդիր հանուն Հայաստանի» հիմնադրամ, «Հայաստանի մանուկներ» հիմնադրամ (ՔՈԱՖ): «Փոքրիկ ներդրումներով կարելի է հասնել մեծ արդյունքների» Վարդան Փարթամյան, «Դասավանդիր հանուն Հայաստանի» կրթական հիմնադրամի առաջխաղացման գծով տնօրեն Կրթության զարգացումն ու այս ոլորտում առկա մարտահրավերների հաղթահարումը միայն մեկ պետական կառույցի կամ մի քանի հարուստ բարերարի պատասխանատվության դաշտը չէ։ Այստեղ պետք է կոլեկտիվ մոտեցում, որովհետեւ կրթության հաջողությունը բոլորինս է, նույնը՝ նաեւ ձախողման դեպքում։ «Դասավանդիր հանուն Հայաստանի» հիմնադրամը շատ է կարեւորում մասնակցությունն «Օգնենք միասին» նախագծին։ Այս տարի մարզեր ենք գործուղելու մեր ուսուցիչ-առաջնորդների 12-րդ սերունդը, եւ այս համագործակցության շնորհիվ է, որ նրանց կկարողանանք տեղավորել Լոռու եւ Տավուշի մարզերում։ Այսօրվա իրականությունում շատ ենք խոսում ցինիզմի եւ անտարբերության մասին, բայց մեր ծրագրի մաս կազմող երիտասարդները, ուսուցիչ-առաջնորդներն, ամեն օր ապացուցում են՝ իրականությունը մի փոքր այլ է: Սուսաննա Թադեւոսյան, «Հույսի կամուրջ» հասարակական կազմակերպության նախագահ Շատ հաճախ փոքրիկ ներդրումներով կարելի է հասնել մեծ արդյունքների։ Առավել եւս, երբ նույնքան մեծ է ձգտումդ եւ նվիրվածությունդ։ Մեր կազմակերպությունը կրթության ներառականության եւ հավասարապես որակյալ լինելու առաջամարտիկն է։ Եթե որեւէ մեկն ինձ հարցնի՝ իսկ ո՞րն է ներառական կրթությունը, կասեմ՝ երբ երեխան իրեն մասնակից է զգում կրթության գործընթացում։ «Օգնենք միասին» նախաձեռնությունը շատ խորհրդանշական է, որովհետեւ այն փորձում է մասնակցային ձեւով օգնել կրթության մասնակցային գործընթացին։ Ամեն երեխա արժեք է, իսկ կրթությունը որոշում է նրա կյանքի որակը։ Հասմիկ Սարգսյան, «Հայաստանի մանուկներ» բարեգործական հիմնադրամի բարերարների հետ հարաբերությունների եւ ֆոնդահայթայթման համակարգող Մենք Հայաստանի մարզերում գործունեություն ենք ծավալում ավելի քան 20 տարի։ Հիմնադրամի նպատակն է հասանելի դարձնել հնարավորությունները, այդ թվում՝ մարզերում։ Yandex Armenia-ի օգնությամբ կկարողանանք ընդլայնել մեր գործունեությունը։ «Փոքր գյուղից՝ Երեւան, Երեւանից՝ օդանավ՝ առանց վերադարձի». որո՞նք են կրթության ոլորտում եղած առավել ցավոտ խնդիրները Վարդան Փարթամյան Ցանկացած երեխա, անկախ ծննդյան վայրից, արժանի է ստանալ լավագույն կրթությունը: Այդ պատճառով մենք աջակցում ենք երիտասարդության ներգրավմանը գյուղական, այդ թվում՝ սահմանամերձ համայնքներում՝ որպես ուսուցիչներ: Որո՞նք են կրթության ոլորտում առկա առավել ցավոտ խնդիրները. բարդ հարց է, կուզեի մեջբերել վիճակագրական տվյալներ։ Դրանք հաճախ եմ ներկայացնում, բայց կարծում եմ՝ կրկնելը կարեւոր է, որպեսզի բոլորս ընկալենք խնդրի ծավալը։ Այս պահի դրությամբ Հայաստանում կա ուսուցչի 700 թափուր հաստիք, հիմնականում՝ գյուղական, սահմանամերձ համայնքներում։ Թափուր աշխատատեղ ասելով՝ նկատի ունեմ, որ, օրինակ, դպրոցը չունի ֆիզիկայի ուսուցիչ։ Սա լուրջ խոչընդոտ է եւ ունի հետեւանք։ Այս վիճակագրությունը երբեք ուրախությամբ չեմ նշում, բայց Հայաստանում յուրաքանչյուր երեք երեխայից մեկը ֆունկցիոնալ անգրագետ է։ Հայ ժողովուրդը, որը հարյուրամյակներով եւ հազարամյակներով կրթությունը վերադասել է ամեն տեսակի նյութական կարողություններին, այսօր նման իրավիճակում է։ Մեր աշակերտների 25 տոկոսը չի հաղթահարում ամենացածր շեմը մաթեմատիկայից ու բնագիտական առարկաներից: Խնդիրներն, իհարկե, շղթայական են։ Կրթության ոլորտի մասին խոսելիս պետք է քննարկել ոչ միայն դպրոցը կամ համալսարանը, այլեւ՝ աշխատատեղը։ Օրինակ՝ Հայաստանի աշխատատեղերի 85 տոկոսը կենտրոնացած է Երեւանում։ 2023թ.-ի համեմատ այս թիվն աճել է 3 տոկոսով։ Սա նշանակում է, որ եւս մոտ հինգ տարուց աշխատատեղերի 100 տոկոսը կկենտրոնանա մայրաքաղաքում։ Ի՞նչ է սա մեզ տալիս՝ որպես հավասար զարգացող երկիր։ Խնդիրը, որը սկսվում է մարզային դպրոցում ֆիզիկայի ուսուցչի բացակայությունից, մեզ բերում է նրան, որ Երեւանում կենտրոնանում է ամեն ինչ։ Սուսաննա Թադեւոսյան Մարզերում, այո՛, կա ուսուցիչների պակաս, բայց կարեւոր է նաեւ, որ եղած ուսուցիչները լինեն որակյալ։ Կարելի է հաստիքով ունենալ ֆիզիկայի ուսուցիչ, բայց... Մենք, ընդհանուր առմամբ, պետք է փոխենք վերաբերմունքը կրթության նկատմամբ։ Կարելի է շատ սիրուն ձեւակերպումներով փաստաթղթեր ընդունել, բայց չտեսնել իրական փոփոխություններ։ Կրթությունը շարունակում է գիտելիքահենք ընթացքը, որում մոռացված է երեխան։ Սա այն պարագայում, որ այս համակարգում կարեւորագույն դերակատարը հենց երեխան է։ Կրթական համակարգը պետք է ծառայի երեխային եւ լինի այնքան ճկուն, որ օգնի անընդհատ զարգանալ։ Ոլորտը փոխվում է ամեն օր եւ հնարավոր չէ հին ձեւաչափով կրթել նոր սերունդներ։ Հասմիկ Սարգսյան Տխուր վիճակագրություն լսեցինք, բայց պետք է խոսենք նաեւ լուծումների մասին։ Օրինակ՝ «Հայաստանի մանուկներ» հիմնադրամը մշտապես փորձում է փոփոխել, վերանայել իր դասընթացները։ Սկսում ենք աշխատել մեկ ուղղությամբ, հետո տեսնում ենք, որ ակադեմիական կրթությունը չի կարողանում տրամադրել հենքը, որպեսզի մեր՝ արտադասարանական կրթությունը լրացնի այն, ու վերանայում ենք մեր մոտեցումը։ Օրինակ՝ մի քանի տարի առաջ շատ պահանջված էր ռոբոտիկան եւ այդ ուղղությամբ ծրագրեր իրականացնելը։ Մենք էլ սկսեցինք դասընթաց, բայց տեսնելով, որ ֆիզիկայի ուսուցման մակարդակը ցածր է, վերանայեցինք մեր դասընթացը՝ դարձնելով այն մեխանիկա։ Արամ Փախչանյան Փորձը ցույց է տալիս, որ երբ լուծում ենք մեկ խնդիր, առանց լուծելու մյուսները, ի սկզբանե եղած խնդիրը սրվում է։ Այսինքն, եթե լուծում ենք կրթության բարելավման խնդիրը մարզերում՝ անտեսելով աշխատատեղերի հարցը, մարզում ապրող երեխան լավ է սովորում, որոշում է համալսարան ընդունվել, այդ նպատակով գալիս է Երեւան ու այլեւս չի վերադառնում իր համայնք։ Երբ Երեւանում սովորած երեխայի համար չենք ստեղծում միջավայր, որում նա կցանկանա մնալ, գալիս է հաջորդ փուլը՝ մեկնել արտերկիր։ Այսպիսով շղթան ձգվում է փոքր գյուղից՝ Երեւան, Երեւանից՝ օդանավ՝ առանց վերադարձի։ Յանա Շախրամանյան Լուսանկարները՝ Էմին Արիստակեսյանի
Go to News Site