Mediamax
Երեւան: Մեդիամաքս: Մայր Աթոռ Սուրբ Էջմիածինը վրդովմունք է արտահայտել Ադրբեջանի իշխանությունների կողմից Ստեփանակերտի Սուրբ Հակոբ եկեղեցին եւ հարակից տարածքում գտնվող խաչքարերն ու կոթողները հողին հավասարեցնելու կապակցությամբ: «Խիստ մտահոգիչ են նաեւ Ստեփանակերտի Առաջնորդանիստ Սուրբ Աստվածածին մայր տաճարի ոչնչացման վերաբերյալ ստացվող տեղեկությունները։ Մայր Աթոռ Սուրբ Էջմիածինը խստորեն դատապարտում է Ադրբեջանի իշխանությունների կողմից իրականացվող Արցախի հոգեւոր եւ մշակութային ժառանգության հետեւողական ոչնչացումը։ Ակնհայտ է, որ Ադրբեջանի իշխանությունը շարունակում է թիրախավորել հայկական քրիստոնեական սրբավայրերը՝ նպատակ ունենալով ջնջել հայկական հետքն Արցախից։ Պետական մակարդակով իրագործվող այս վանդալիզմը հերթական անգամ փաստում է, որ Ադրբեջանի հայատյաց քաղաքականությունը որեւէ փոփոխություն չի կրել, որով եւ կասկածելի են դառնում Հայաստանի հետ կայուն ու երկարատեւ խաղաղություն հաստատելու մասին հայտարարությունները։ Մայր Աթոռ Սուրբ Էջմիածինը կոչ է անում ՀՀ կառավարության ղեկավարին եւ իշխանության ներկայացուցիչներին հրատապ ու գործուն քայլեր ձեռնարկել՝ կանխելու Արցախի հոգեւոր եւ մշակութային ժառանգության համակարգված յուրացումն ու ոչնչացումը։ Կոչ ենք անում նաեւ մշակութային ժառանգության պահպանությամբ, տարածաշրջանում ժողովուրդների խաղաղ համակեցությամբ եւ փոխգործակցությամբ շահագրգիռ բոլոր պետություններին ու միջազգային կազմակերպություններին ազդու միջոցներ ձեռնարկել՝ կասեցնելու մշակութային ոճրագործություններն Արցախում»,- ասվում է Մայր Աթոռի հայտարարությունում:
Go to News Site