Փիթեր Բալաքյանը Սթենֆորդում կխոսի պոեզիայի եւ Հայոց ցեղասպանության մասին

Պուլիցերյան մրցանակակիր բանաստեղծ Փիթեր Բալաքյանը ապրիլի 27-ին Սթենֆորդի համալսարանում հանդես կգա դասախոսությամբ՝ «Պոեզիա, տրավմատիկ պատմություն, հիշողություն. մտածելով Հայոց ցեղասպանության մասին» թեմայով։ Միջոցառման կազմակերպիչներն են Սթենֆորդի Աբբասիի իսլամական ուսումնասիրությունների ծրագիը, Ռուսաստանի, Արեւելյան Եվրոպայի եւ Եվրասիայի ուսումնասիրությունների կենտրոնն ու Պատմության ամբիոնը: Փիթեր Բալաքյանը կանդրադառնա այն հարցին, թե ինչպես է գրականությունը վերաիմաստավորում պատմական հիշողությունը եւ ինչ դեր կարող է ունենալ պոեզիան՝ սերնդեսերունդ փոխանցվող տրավմատիկ փորձի մշակման մեջ։ Բալաքյանը կներկայացնի, թե ինչպես է Հայոց ցեղասպանությունը ձեւավորել իր գրական աշխարհը՝ անդրադառնալով տրավմայի միջսերնդային փոխանցման խնդիրներին եւ պոեզիայի կարողությանը՝ արտահայտելու պատմական վայրագությունների փորձը։ Նա կներկայացնի նաեւ ընտանեկան հիշողությունները, այդ թվում՝ իր նախնի Գրիգորիս Բալաքյանի պատմությունը, որը Հայոց եկեղեցու եպիսկոպոս էր եւ 1915 թվականի ապրիլի 25-ին 250 ձերբակալված հայ մտավորականների թվում էր։ Փիթեր Բալաքյանը կպատմի նաեւ իր տատիկի՝ Նաֆինա Շեքերլեմջյանի մասին, որն իր երկու փոքրիկ դուստրերի հետ վերապրել էր Սիրիայի անապատ տանող մահվան երթը։ Փիթեր Բալաքյանը ինը բանաստեղծական ժողովածուի եւ չորս արձակ ստեղծագործության հեղինակ է։ 2016 թվականին նրա «Օզոնի հանդես» բանաստեղծությունների շարքը արժանացել է Պուլիցերյան մրցանակի: Նրա վերջին բանաստեղծական գիրքը «Նյույորքյան եռերգություն» է։ Փիթեր Բալաքյանի «Ճակատագրի սեւ շունը» հուշագրությունը 1998 թվականին արժանացել է PEN/Martha Albrand մրցանակին: «Այրվող Տիգրիս. Հայոց ցեղասպանությունը եւ Ամերիկայի արձագանքը» գիրքը 2005 թվականին արժանացել է Ռաֆայել Լեմկինի մրցանակին եւ դարձել է The New York Times-ի բեսթսելլեր։

Go to News Site