„Við erum að breyta hvernig við hugsum um taugahrörnunarsjúkdóma“

Hópur vísindamanna hefur komist að því að skemmdir í hvíta efni heilans geta einnig hrundið af stað einkennum sem tengjast taugahrörnunarsjúkdómum í heila. Þau eru hins vegar ekki skaðleg heldur mikilvægur hluti af endurmyndun heilavefjar. „Við erum að breyta hvernig við hugsum um taugahrörnunarsjúkdóma,“ segir Ragnhildur Þóra Káradóttir, prófessor í taugalífeðlisfræði við Cambridge-háskóla og Læknadeild HÍ. Hún fór fyrir rannsókninni en niðurstöður hennar birtust í vísindatímaritinu Nature í gær. Niðurstöður ganga gegn hefðbundnum hugmyndum um bólgur í heila Ragnhildur Þóra útskýrir að skemmdir í hvíta efni heilans séu einkenni taugahrörnunarsjúkdóma eins og MS og Alzheimer auk aldurstengdrar heilabilunar. Skemmdirnar hafi þó hingað til ekki fengið mikla athygli í vísindalegum rannsóknum. „Við erum með nýja nálgun að skoða hver áhrif skemmda eru á hvíta efnið,“ útskýrir hún. Þau hafi prófað að búa til skemmd á einum stað í heilanum og sáu að það geti sett af stað röð atburða á allt öðrum stað. Atburðirnir eru þekkt einkenni taugahrörnunarsjúkdóma, líkt og bólgumyndun og breytingar í virkni heilans. Vísindamennirnir sýndu fram á að ef skemmdirnar í hvíta efninu eru lagaðar breytist svar heilans: bólgumyndun og virkni heilans verður eins og hún var fyrir skemmdir. Niðurstöðurnar ganga gegn hefðbundnum hugmyndum um bólgur í heila. Almennt hefur verið litið svo á að bólgur í gráa efni heilans séu skaðlegar heilsu en niðurstöður rannsóknarinnar benda til að skammvinnt bólgusvar sé hluti af endurnýjunarferli heilans. Gæti breytt meðhöndlun sjúkdóma Niðurstöðurnar eru þær fyrstu í röð rannsókna en hópurinn vonast til þess að þær muni hafa áhrif á hvernig taugahrörnunarsjúkdómar eru meðhöndlaðir. Ragnhildur segir rannsóknina sýna fram á að hvíta efnið geti verið lykill að því að finna upptök heilahrörnunarsjúkdóma. Þá sé mögulega hægt að nýta þær til að reyna að finna leið til að draga úr eða hamla framgangi taugahrörnunar. „Við þurfum náttúrlega að fara í frekari rannsóknir til að skoða þetta. Við erum að breyta hvernig við hugsum um taugahrörnunarsjúkdóma. Þar af leiðandi opnar það möguleika á að finna ný lyf, nýja aðferð til að hamla framgangi þessara sjúkdóma,“ segir Ragnhildur. Auk hennar eru þau Tanja Mist Birgisdóttir og Sindri Snær Gíslason, doktorsnemar við Læknadeild HÍ, meðal höfunda greinarinnar ásamt stórum hópi vísindamanna við Cambridge-háskóla og vísindastofnanir víðar í Evrópu og Bandaríkjunum.

Go to News Site