Kajgana
Каде завршија милионите што Орбан ги пратил во Војводина пред изборите? Александра Спасеска 24.04.2026 / 09:21 Регион Владата на Виктор Орбан, унгарскиот премиер во заминување, распределила 12 милиони евра на организации на војводинските Унгарци пред неодамнешните парламентарни избори, а дури 660.000 евра отидоа во мистериозното граѓанско здружение Agenda. Парите биле исплатени преку државната фондација Betlen Gabor во периодот од пет недели пред изборите одржани на 12 април, открива независниот портал на унгарски јазик во Војводина Szabad Magyar Szó. Здружението Agenda е исто така на списокот на војводински организации на кои унгарската држава им доделила средства. Новинарите од порталот Szabad Magyar Szó се обидоа да дознаат од неколку извори што прави, но никој од луѓето со кои разговараа не можеше да им одговори. „Нè интересираше што точно прави граѓанската организација регистрирана на адресата на седиштето на Сојузот на војводинските Унгарци во Суботица. Интересно е што здружението нема веб-страница, па дури ни е-адреса, што е шокантно во 21 век“, наведува порталот. Здружението никогаш не беше споменато во локалните медиуми, а освен претседателот нема други членови. Тие додаваат дека преку понатамошно истражување откриле дека на чело на организацијата е Карољ Пал, поранешен висок функционер на Сојузот на војводинските Унгарци. „Во декември 2025 година, првиот грант од 330.000 евра од фондацијата Betlen Gabor беше депониран на сметката на здружението на граѓани Agenda, но тоа очигледно не беше доволно, бидејќи истиот износ им беше исплатен во март. Ова значи дека помеѓу декември и март, оваа граѓанска организација, за која никој не знаеше што прави, доби 660.000 евра поддршка од владата на Виктор Орбан, која претрпе тежок пораз на парламентарните избори“, наведува Szabad Magyar Szó во својата статија. Откако порталот објави статија за распределбата на 12 милиони евра на 19 април, претседателот на Сојузот на војводинските Унгарци, Балинт Пастор, во вторникот на унгарското радио Суботица, изјави дека одредени медиуми се обидуваат да ја дискредитираат СВМ и институциите на војводинските Унгарци. „Гледам дека разни, ќе ги наречам 'медиумски производи', се обидоа да го дискредитираат Сојузот на војводинските Унгарци во изминатите денови и недели, а уште повеќе образовните, културните и информативните институции на војводинските Унгарци“, рече Пастор. Србија Унгарија Автор/Извор А.С. Прикажи во метро On
Go to News Site