Mediamax
Երեւան: Մեդիամաքս: Իլհամ Ալիեւը հայտարարել է, որ «Ադրբեջանը հարմարվում է այս նոր իրականությանը եւ կյանքին խաղաղ պայմաններում»։ Այս մասին ասված է «Գեռնիկայի խաղաղության եւ հաշտեցման մրցանակի» հիմնադիրներին ուղղված Ալիեւի ուղերձում: Մրցանակը շնորհվել է Ադրբեջանի նախագահին եւ Հայաստանի վարչապետին։ «Ադրբեջանի ժողովուրդը, որը կրել է պատերազմի ծանր հետեւանքները եւ գրեթե երեսուն տարի ապրել է հակամարտության պայմաններում, չափազանց լավ է հասկանում խաղաղության եւ հաշտեցման արժեքը: Այսօր Ադրբեջանը սովորում է ապրել խաղաղության մթնոլորտում: Մեզ համար դա նոր եւ անսովոր զգացողություն է, քանի որ անկախության ձեռքբերման պահից ի վեր մենք այն փորձարկելու հնարավորություն չենք ունեցել: 2025 թվականի օգոստոսին Վաշինգտոնում կայացած գագաթնաժողովում նախաստորագրվել է Ադրբեջանի եւ Հայաստանի միջեւ խաղաղության համաձայնագիրը, ինչպես նաեւ տեղի է ունեցել Համատեղ հռչակագրի ստորագրումը, ինչը վերջ դրեց երեք տասնամյակ տեւած հակամարտությանը եւ հիմք դրեց մեր ժողովուրդների միջեւ խաղաղության, հաշտեցման ու գործընկերության համար: Ներկայում Ադրբեջանը հարմարվում է այս նոր իրականությանը եւ կյանքին խաղաղ պայմաններում: Այս բարենպաստ մթնոլորտը եւ կայունության ու անվտանգության նկատմամբ աճող վստահությունը թույլ են տալիս մեզ առաջ շարժվել եւ ավելի շատ ժամանակ ու ռեսուրսներ տրամադրել զարգացման մեր օրակարգին: Միեւնույն ժամանակ, մենք միջոցներ ենք ձեռնարկում խաղաղության ամրապնդման եւ այն գործնականում կիրառելու ուղղությամբ, եւ մեր երկու հասարակություններն արդեն իսկ զգում են խաղաղության իրական օգուտները տնտեսական, առեւտրային եւ այլ ոլորտներում: Այսօր Ադրբեջանն ապահովում է սեփական նավթամթերքի, ինչպես նաեւ երրորդ երկրներից ցորենի եւ այլ ապրանքների արտահանումը Հայաստան՝ իր տարածքով: Երկու երկրների միջեւ վստահության ամրապնդման միջոցառումները վճռորոշ նշանակություն ունեն տեւական խաղաղության հաստատման համար: Քաղաքացիական հասարակության ներկայացուցիչների կանոնավոր հանդիպումները, պետական մակարդակով իրականացվող նախաձեռնությունների հետ մեկտեղ, դրական ավանդ են ներդնում այս գործընթացում: Ադրբեջանի եւ Հայաստանի օրինակը վկայում է, որ, չնայած ձգձգված հակամարտությանը, տառապանքներին եւ փոխադարձ անվստահությանը, խաղաղությունը կարող է ձեռք բերվել ամուր քաղաքական կամքի եւ միջազգային աջակցության առկայության դեպքում», - ասված է Ալիեւի ուղերձում:
Go to News Site