Fréttastofa RÚV
Keníumaðurinn Sabastian Sawe varð í gær fyrstur manna til að hlaupa maraþonhlaup í keppni og án aðstoðar á undir tveimur klukkustundum þegar hann kom fyrstur allra í mark í Lundúnamaraþoninu á einni klukkustund, 59 mínútum og 30 sekúndum. Rétt á eftir honum kom annar maðurinn frá upphafi til að hlaupa á undir tveimur klukkutímum því Yomif Kejelcha frá Eþíópíu gerði það líka því hann hljóp á 1:59:41. Hlynur Andrésson, Íslandsmethafi í maraþonhlaupi, horfði af eftirvæntingu á Lundúnamaraþonið í gær. Vildi alls ekki missa af þessu hlaupi „Ég fylgdist spenntur með þessu hlaupi í gær því þetta var auðvitað risastórt maraþon. Þarna voru margir bestu hlauparar heimssögunnar. Þarna var Ólympíumeistarinn Tamirat Tola, svo var heimsmethafinn í hálfmaraþoni, Jacob Kiplimo, Yomif Kejlecha sem var að hlaupa sitt fyrsta maraþon en hefur verið svona einn besti hlaupari heims undanfarinn áratug í öllum greinum, frá 3000 metra hlaupi og upp í hálfmaraþon og svo var Sabastian Sawe líka mættur en hann hefur verið eiginlega besti maraþonhlaupari síðustu tveggja ára. Þannig ég vildi sko ekki missa af þessu einvígi.“ En átti Hlynur von á því að tveggja klukkustunda múrinn yrði brotinn í gær? „Ég átti ekkert endilega von á því að þeir myndu hlaupa undir tveimur klukkutímum. En ef maður lítur á þetta þannig að allir þessir sterku hlauparar hafi verið í þessu hlaupi og að aðstæður hafi verið fullkomnar og skóbúnaðurinn alltaf að verða betri og betri, þá skilur maður vel hvers vegna þetta gerðist í gær,“ segir Hlynur. Þróunin á hlaupaskónum hjálpar mikið En hvers vegna hjálpa hlaupaskórnir svona mikið og hvað er að breytast þar? „Froðan í skónum er alltaf að verða betri og svo frá árinu 2018 hafa verið settar carbon-plötur í skóna til að gefa meiri stuðning og endurgjöf í hverju skrefi. Þetta hefur alveg breytt maraþonleiknum því menn eru nú ekki lengur að brotna eins mikið niður seinni hluta hlaupsins og var áður. Þannig að nú geta menn tekið meiri sénsa með hraðann til að reyna að ná svona ótrúlegum tíma.“ „Hæfileikarnir hjá þessum þremur fyrstu í hlaupinu sem fóru undir heimsmetstímann eru ólíkir einhverju sem við höfum séð áður. Það er kannski bara Eliud Kipchoge sem hefur verið svona góður. En svo eru þjálfunaraðferðir stöðugt að verða betri. Með tilkomu samfélagsmiðla er líka sífellt auðveldara að sækja sér upplýsingar. Næringin er líka alltaf að verða betri og persónulegu drykkirnir sem hlauparar geta tekið í maraþonhlaupum eru að verða vísindalegri, eða betri fyrir kolvetnaupptöku og skórnir eru svo líka alltaf að taka fleiri skref fram á við,“ segir Hlynur Andrésson við RÚV. Sawe múrbrjótur eins og Bannister Þessi tveggja klukkustunda múr í maraþonhlaupi hefur verið hindrun sem mönnum hefur þótt erfitt að yfirstíga á undanförnum árum. Þessu takmarki hefur stundum verið líkt við það þegar Roger Bannister hljóp fyrstur allra míluna fyrstur undir fjórum mínútum árið 1954, en það var tími sem þótti óhugsandi að hlaupa undir í einnar mílu hlaupi og margir höfðu reynt að gera í þó nokkurn tíma. „Þegar Bannister fór míluna á undir fjórum mínútum þá hljóp annar maður mánuði seinna líka á undir fjórum mínútum. Ég held ekkert endilega að við munum sjá fleiri hlaupa maraþon á undir tveimur klukkustundum á þessu ári en hver veit hvort þetta verði bara nýja viðmiðið? Það kæmi allavega ekki á óvart miðað við hvernig hlaupin hafa verið að þróast. Þegar ég byrjaði í hlaupum árið 2012 var heimsmetið í maraþoni 2:03:38, og núna eru menn farnir að hlaupa fjórum mínútum hraðar. Þannig þetta er í raun bara algjör vísindaskáldskapur,“ segir Hlynur. Hlauabrettið á 21,3 í tvo klukkutíma En ef við setjum hraðann í samhengi „Hraðinn sem Sabastian Sawa hljóp á í gær væri eins og að setja hlaupabretti á 21,3 og hlaupa þannig í næstum tvo klukkutíma. Þetta er eiginlega ómannlegt. Til að setja þetta í frekara samhengi þá er Íslandsmetið í 5 km götuhlaupi 13:42 mín. en þeir hlupu síðustu fimm kílómetrana í þessu maraþoni í gær hraðar en það.“ En hvernig ætli það hafi verið fyrir Yomif Kejelcha frá Eþíópíu að hafa líka hlaupið maraþon undir tveimur klukkutímum í gær, en ekki verið sá fyrsti. Er það ekki bara svipað og að vera Buzz Aldrin sem var annar maðurinn til að stíga fæti á tunglið á eftir Neil Armstrong? „Þetta var nú bara hans fyrsta maraþon og hann hefur verið meðal fimm efstu með bestu tíma heims í öllum hlaupagreinum frá 3000 metrum og upp í maraþon núna. Það er í raun alveg óhugsandi því það er svo erfitt að vera svona góður í öllum þessum greinum. Þannig ég er rosalega spenntur að sjá hvað hann mun gera á sínum ferli í maraþonhlaupum miðað við þetta fyrsta maraþon hans. Hann á líka næstbesta hálfmaraþontíma sögunnar,“ segir Hlynur sem sjálfur stefnir á met í maraþoni eftir nokkra daga. Hlynur stefnir á Íslandsmetið eftir nokkra daga Hlynur mun hlaupa í Kaupmannahafnarmaraþoninu í Danmörku sunnudaginn 10. maí eftir tæpar tvær vikur. Þar stefnir hann á að slá Íslandsmet sitt í maraþoni frá 2021 sem er 2:13:37 og vonast um leið eftir því að fá þátttökurétt á Evrópumótinu í frjálsíþróttum í Birmingham í ágúst. „Ég held ég sé í formi til að hlaupa á tveimur klukkutímum og ellefu til tólf mínútum. Það er allavega það sem ég stefni á og svona í takt við tímann sem ég hljóp á þegar ég setti Íslandsmetið í hálfmaraþoni í síðasta mánuði,“ segir Hlynur sem hljóp hálfmaraþon á 1:02:30 í Belgíu 8. mars.
Go to News Site