COPE
O BNG de Lugo levou a súa campaña “Pronúnciate” ata as portas dos xulgados da cidade para visibilizar e defender o dereito da cidadanía a recuperar os seus nomes e apelidos en galego. Trátase dun acto simbólico co que a formación nacionalista quixo chamar á mobilización social en favor da lingua. A iniciativa, impulsada polo Bloque Nacionalista Galego, busca promover a galeguización da onomástica como unha forma de reparar unha “inxustiza histórica” derivada da castelanización imposta e avanzar na normalización lingüística. Militantes e cargos públicos acudiron aos xulgados para reivindicar que o proceso sexa coñecido, accesible e asumido con normalidade. O portavoz do BNG Lugo, Rubén Arroxo, destacou que recuperar os apelidos orixinais é “un acto de xustiza” coa lingua e coa memoria. Animou á cidadanía a dar o paso, ao tratarse dun proceso “sinxelo”. Na mesma liña, Xavier, militante de base do partido, subliñou que é “un xesto de compromiso coa lingua”. Incidiu ademais na rapidez do trámite, que pode facerse en poucos días ou mesmo en minutos por vía dixital. Pola súa banda, Maite Ferreiro apelou á recuperación da identidade. A nacionalista lembrou que xa galeguizou o seu nome e defendeu “non dar nin un paso atrás” na dignificación dos nomes en galego para as novas xeracións. Baixo o lema “Pronúnciate! Con nome e apelidos en galego”, o BNG anima así á veciñanza a galeguizar a súa identidade oficial. A campaña combina accións informativas, mobilización social e reivindicación institucional.
Go to News Site