Ազատություն
«Շատ կարևոր իրադարձություն է տեղի ունեցել»,- խոսելով Ադրբեջանի փոխվարչապետ Շահին Մուստաֆաևի՝ Հայաստան կատարած պաշտոնական այցի մասին, ասաց վարչապետ Նիկոլ Փաշինյանը: «Համարում եմ երկու երկրների փոխվարչապետերի այցերը պատմական՝ խաղաղության գործընթացի տրամաբանության մեջ, և ես շատ ուրախ եմ, որ եկել ենք այս հանգրվանին»,- կառավարության նիստից հետո լրագրողների հետ ճեպազրույցի ընթացքում նշեց Փաշինյանը: «Կարծում ենք՝ Հայաստանի և Ադրբեջանի միջև հարաբերությունները պետք է շարունակաբար լավարկվեն, խաղաղությունը գնալով ուժեղանա և պետք է հաստատվեն բնականոն հարաբերություններ, երկարաժամկետում՝ ռազմավարական առումով բարիդրացիական հարաբերություններ»,- շեշտեց վարչապետը: Նախօրեին Հայաստան էր ժամանել Ադրբեջանի պատվիրակությունը՝ փոխվարչապետ Շահին Մուստաֆաևի գլխավորությամբ: Մուստաֆաևը նաև սահմանազատման ադրբեջանական հանձնաժողովի նախագահն է։ Հայաստանի արտգործնախարարության հաղորդագրության համաձայն՝ փոխվարչապետ Մհեր Գրիգորյանի և Շահին Մուստաֆաևի նախագահությամբ երեկ տեղի է ունեցել երկու երկրների միջև պետական սահմանի սահմանազատման և սահմանային անվտանգության հարցերով հանձնաժողովի և պետական սահմանի սահմանազատման պետական հանձնաժողովի 13-րդ հանդիպումը: «Գոհունակությամբ նշվել է, որ հանձնաժողովների 13-րդ հանդիպումը կրկին կայանում է կողմերից մեկի տարածքում՝ Հայաստանի Հանրապետությունում՝ Աղվերանում: Հանդիպման ընթացքում կողմերը մանրամասն մտքեր են փոխանակել սահմանազատման միջոցառումների հետ կապված կազմակերպչական և տեխնիկական հարցերի շուրջ:
Go to News Site