Mediamax
Երեւան: Մեդիամաքս: Ֆրանսիայի նախագահ Էմանուել Մակրոնը մայիսի 3-ից 5-ը Հայաստանում կլինի: Ֆրանսիայի նախագահը նախ կմասնակցի Երեւանում կայանալիք Եվրոպական քաղաքական համայնքի գագաթնաժողովին: ՀՀ կառավարությունից հայտնել են, որ մայիսի 5-ին կմեկնարկի Էմանուել Մակրոնի պետական այցը Հայաստան: Տեղի կունենա ՀՀ վարչապետ Նիկոլ Փաշինյանի եւ Ֆրանսիայի նախագահի առանձնազրույցը, որին կհաջորդի ընդլայնված կազմով հանդիպումը: Փաստաթղթերի ստորագրման արարողությունից հետո Նիկոլ Փաշինյանը եւ Էմանուել Մակրոնը հանդես կգան ԶԼՄ-ների համար հայտարարություններով: Էմանուել Մակրոնը Ծիծեռնակաբերդի հուշահամալիրում հարգանքի տուրք կմատուցի Հայոց ցեղասպանության զոհերի հիշատակին, կայցելի Մատենադարան: Տեղի կունենա նաեւ ՀՀ նախագահ Վահագն Խաչատուրյանի եւ Ֆրանսիայի նախագահ Էմանուել Մակրոնի հանդիպումը: Պետական այցի շրջանակում Ֆրանսիայի նախագահը ՀՀ վարչապետի ուղեկցությամբ կայցելի Գյումրի, որտեղ հարգանքի տուրք կմատուցի 1988 թվականի երկրաշարժի զոհերի հիշատակին: Նիկոլ Փաշինյանը եւ Էմանուել Մակրոնը Գյումրիում ներկա կգտնվեն «Երաժշտական կամուրջ. Հայաստան-Ֆրանսիա» խորագրով համերգին:
Go to News Site