ඩොලර් මිලියන 2.5ක වංචාවට වැඩ තහනම් වූ නිලධාරියෙක් හදිසියේ මියයයි!

ඩොලර් මිලියන 2.5ක මූල්‍ය වංචාවකට අදාළව චෝදනා ලබා සේවය තහනම් කර සිටි රජයේ නිලධාරියෙකු මිය ගොස් ඇති බව සත්‍යාපිත ආරංචි මාර්ග තහවුරු කරයි. මියයන විට මෙම නිලධාරියා අදාළ වංචාව සම්බන්ධයෙන් පැවැත්වෙන පරීක්ෂණ හේතුවෙන් අනිවාර්ය නිවාඩු ගන්වා සිටි අයෙකි. එමෙන්ම ඔහුට දින දෙකකට පෙර විදෙස් ගමන් තහනමක් ද පනවා තිබිණි. අදාළ මූල්‍ය අක්‍රමිකතාව සම්බන්ධයෙන් අපරාධ පරීක්ෂණ දෙපාර්තමේන්තුව සහ අල්ලස් හෝ දූෂණ චෝදනා විමර්ශන කොමිෂන් සභාව මගින් දීර්ඝ විමර්ශනයක් පවත්වමින් තිබුණි. මරණය සිය දිවි නසා ගැනීමක්  දැයි සැකයක් ද මතු වී ඇත. මෙම නිලධාරියාගේ අභාවයත් සමඟ එම පරීක්ෂණවල ඉදිරි ගමන්මග පිළිබඳව මේ වන විට නීතිමය අවධානය යොමුව තිබේ. සිද්ධියට අදාළ වැඩිදුර තොරතුරු සහ මරණයට හේතුව මෙතෙක් නිල වශයෙන් අනාවරණය වී නොමැති අතර, ඉදිරි පරීක්ෂණ කටයුතු සඳහා දේහය පිළිබඳ පශ්චාත් මරණ පරීක්ෂණය පැවැත්වීමට නියමිතය. මෙම ඩොලර් මිලියන 2.5ක මූල්‍ය අක්‍රමිකතාව සම්බන්ධයෙන් මුදල් අමාත්‍යාංශයේ ජ්‍යෙෂ්ඨ නිලධාරීන් සිව් දෙනෙකුගේ වැඩ තහනම් කිරීමට පියවර ගෙන තිබිණි. මෙලෙස වැඩ තහනමට ලක්ව ඇත්තේ රාජ්‍ය ණය කළමනාකරණ කාර්යාලයේ (PDMO) අතිරේක අධ්‍යක්ෂ ජනරාල්වරයෙකු සහ අධ්‍යක්ෂවරයෙකු මෙන්ම, විදේශ සම්පත් දෙපාර්තමේන්තුවේ (ERD) අධ්‍යක්ෂවරයෙකු සහ සහකාර අධ්‍යක්ෂවරයෙකි. මියගොස් ඇති බවට වාර්තා වන නිලධාරියා ද මෙම සිව්දෙනා අතරින් අයෙකු බව පැවසේ. මෙම දැවැන්ත මූල්‍ය වංචාව සම්බන්ධයෙන් වන විමර්ශන අපරාධ පරීක්ෂණ දෙපාර්තමේන්තුව (CID), ශ්‍රී ලංකා මහ බැංකුවේ මූල්‍ය බුද්ධි ඒකකය (FIU) සහ ශ්‍රී ලංකා පරිගණක හදිසි ප්‍රතිචාර සංසදය (SLCERT) ඒකාබද්ධව සිදුකරනු ලබයි. මීට අමතරව ඕස්ට්‍රේලියානු බලධාරීන් ඇතුළු ජාත්‍යන්තර විමර්ශන කණ්ඩායම්වල සහාය ද මේ සඳහා ලබා ගනිමින්  පවත්මින් ඇත. -lankasara

Go to News Site