Հայ գերիների ընտանիքները նամակով դիմել են Կանադայի վարչապետին

Երեւան: Մեդիամաքս: Բաքվում պահվող հայ գերիների ընտանիքները բաց նամակով դիմել են Հայաստանում գտնվող Կանադայի վարչապետ Մարկ Քարնիին՝ խնդրելով Պատանդների հարցերով Կանադայի ավագ պաշտոնյային ներգրավել «հայ գերիների ազատման հարցում եւ աջակցել նրանց անհապաղ ու անվերապահ ազատ արձակման ջանքերին»: Այս մասին հայտնում է freearmenianprisoners.com -ը։ Կանադայի վարչապետ Մարկ Քարնիին ուղղված նամակում գերիների հարազատներն ընդգծել են, որ «Կանադան ցուցաբերել է սկզբունքային առաջնորդություն՝ կամայական ազատազրկման եւ պատանդային դիվանագիտության դեմ պայքարում» «Ստեղծելով Պատանդների հարցերով ավագ պաշտոնյայի ինստիտուտ եւ լինելով Միջպետական հարաբերություններում կամայական կալանքի դեմ հռչակագրի առաջամարտիկ՝ Կանադան հաստատել է, որ պետությունների միջեւ հարաբերություններում մարդիկ չպետք է օգտագործվեն որպես քաղաքական լծակ: Ամենայն հարգանքով նշում ենք, որ մեր հարազատների հետ կատարվողը լիովին համապատասխանում է այս պարտավորությունների ոգուն եւ նպատակին։ Մեր մտահոգությունները խորանում են նրանց կալանքի պայմանների եւ միջազգային դերակատարների կողմից արձանագրված մարդու իրավունքների լուրջ խախտումների պատճառով։ Նրանց դեմ կայացած դատավարությունները լայնորեն քննադատվել են՝ որպես արդար դատավարության սկզբունքների հետ անհամատեղելի գործընթացներ։ Ադրբեջանցի պաշտոնյաները հայտարարել են, որ Լեռնային Ղարաբաղի նախկին պաշտոնյաներին ազատ արձակելու մտադրություն չունեն։ Ադրբեջանում Կարմիր Խաչի միջազգային կոմիտեի ֆիզիկական ներկայության դադարեցումը մեր ընտանիքներին զրկել է նրանց կացության վերաբերյալ կանոնավոր ու անաչառ տեղեկություններ ստանալու հնարավորությունից։ Կանադայի փորձն այս կոչին հաղորդում է բարոյական առանձնահատուկ կշիռ։ Կանադան անցել է հաշտեցման սեփական գործընթացի միջով եւ հասկացել, որ կայուն խաղաղություն կարող է կառուցվել ոչ թե ժխտման, լռության կամ չբուժված վերքերի, այլ ճշմարտության, իրավունքների ճանաչման, հարգանքի, համագործակցության եւ գործընկերության հիման վրա։ Նույն սկզբունքն է գործում նաեւ այստեղ. խաղաղությունը, որը թույլ է տալիս մարդկանց կամայականորեն պահել կալանքի տակ, նրանց ընտանիքներին էլ՝ տառապանքի մեջ, չի կարող լինել վստահելի, կայուն կամարդար»,- ասվում է նամակում։ Նրանք խնդրել են Կանադային օգտագործել իր ձայնը, դիվանագիտական խողովակները եւ Եվրամիության, Միացյալ Նահանգների եւ Կամայական կալանքի դեմ հռչակագրի այլ կողմերի հետ հարաբերությունները Ադրբեջանի վրա ճնշումը համակարգելու համար։ «Խաղաղության նկատմամբ Ադրբեջանի հավատարմությունը հայ հանրությանը վստահություն չի ներշնչի, քանի դեռ հայ բանտարկյալները մնում են գերության մեջ: Նրանց ազատ արձակումը եւ հայրենիք վերադարձնելն անփոխարինելի են խաղաղության ցանկացած իրական գործընթացի համար եւ վստահության ամրապնդման կենսական միջոց են։ Ձեր այցը Երեւան կարեւոր հնարավորություն է ցույց տալու, որ կամայական կալանքին վերջ դնելու Կանադայի հանձնառությունը ոչ միայն խոսք է, այլեւ գործ»,-Բաքվում պահվող հայ գերիների ընտանիքները՝ միաժամանակ կոչ անելով կանադացի պաշտոնյային հանդիպել իրենց։ «Խորապես համոզված ենք, որ Կանադան կարող է սկզբունքային եւ կառուցողական դեր խաղալ մեր ընտանիքների տառապանքները վերջ դնելու գործում»,- ասվում է նամակում։ Մայիսի 4-5-ին Երեւանում անցկացվում է Եվրոպական քաղաքական համայնքի 8-րդ գագաթնաժողովը, որին մասնակցելու համար Հայաստան է ժամանել մոտ 50 բարձրաստիճան պատվիրակություն։

Go to News Site