„Априлско разлистување“ во „Матица“ продолжува до 10 мај

Поради огромниот интерес и по барање на читателите, големата книжевна акција „Априлско разлистување“ на „Матица македонска“ продолжува до 10 мај. Акцијата се одвива во книжарницата на „Матица“ од 10 до 17 часот, како и онлајн, преку веб-страницата www.matica.com.mk. Во рамките на „Априлско разлистување“, читателите имаат можност да изберат од голем број внимателно одбрани изданија со попусти до 80 проценти. Во акцијата се вклучени повеќе од 300 наслови – белетристика, дела од македонски автори, квалитетни преводи од светската книжевност, монографски изданија, книги од областа на културата, историјата, уметноста, духовноста и други вредни наслови од издавачката продукција на „Матица македонска“. Продолжувањето на акцијата е директен одговор на големиот интерес што читателите го покажаа изминатиот период. Во време кога секојдневието е обележано со бројни предизвици, овој интерес уште еднаш потврдува дека македонските читатели ја препознаваат вредноста на добрата книга. Книгата не е само подарок, ниту само личен избор – таа останува трајна културна потреба, простор на знаење, паметење, духовност и убавина. „Априлско разлистување“ се реализира и во знакот на големиот јубилеј – 35 години постоење на „Матица македонска“. Во текот на три и пол децении, „Матица“ изгради препознатлива издавачка мисија: книгата да биде подостапна, поблиска и присутна во секој македонски дом. Токму затоа, јубилејот не се одбележува само свечено, туку и читателски – со отворена покана до сите генерации да го збогатат својот дом со книги што се читаат, се подаруваат, се паметат и се чуваат. Со оваа акција, „Матица македонска“ ја продолжува својата заложба за ширење на читачката култура и за поддршка на домашната книжевност, но и за достапност на значајни дела од светската книжевна и културна традиција. Во понудата се наслови за различни читателски вкусови – од романи и раскази до монографии и изданија што го чуваат културното и историското паметење. „Априлско разлистување“ е повеќе од акција: тоа е потсетување дека книгата има свое место во секој дом, на секоја полица и во секое време. А интересот на читателите е најдобрата потврда дека за добрата книга сè уште има силен глас. Акцијата продолжува до 10 мај – во книжарницата на „Матица“ од 10 до 17 часот и онлајн, преку www.matica.com.mk.

Go to News Site