Նիկոլ Փաշինյանը հայտարարել է «պատմական փոփոխության» մասին

Երեւան: Մեդիամաքս: Հայաստանի վարչապետ Նիկոլ Փաշինյանն այսօր խորհրդանշական է համարել Եվրոպական միության գործընկերների խոսքերն այն մասին, թե Հայաստանը գերազանց աշխարհագրական դիրք ունի։ Այս մասին նա հայտարարել է Եվրոպական Միության Խորհրդի նախագահ Անտոնիու Կոշտայի եւ Եվրոպական հանձնաժողովի նախագահ Ուրսուլա ֆոն դեր Լայենի հետ համատեղ հայտարարություններ անելիս։ «Այս ձեւակերպումներն արտահայտում են ժամանակաշրջանի փոփոխությունը, երբ միեւնույն տեղում գտնվելով՝ մենք քաղաքական գործընթացների արդյունքում պատմական, աշխարհագրական վատ եւ երբեմն՝ սարսափելի դիրքից անցում ենք կատարում դեպի աշխարհագրական գերազանց դիրք: Այն դիրքը, որն օգտագործվում էր մեր բոլոր խնդիրները բացատրելու համար, հիմա պիտի ծառայի իրականացնելու ինքնիշխան, ազատ, բարեկեցիկ, անվտանգ երկիր ունենալու տեսլականը: Սա պատմական փոփոխություն է»,- ասել է Նիկոլ Փաշինյանը։ Նա կարեւորել է ԵՄ-ն հայտարարությունը, որով տնտեսվարողներին կոչ է արվում ներդրումներ կատարել Հայաստանի տնտեսությունում։ «Նախորդող ողջ շրջանում Հայաստանը համարվել է ներդրումների համար ռիսկային գոտի, իսկ հիմա ԵՄ-ն ամենաբարձր մակարդակով տնտեսվարողներին հրավիրում է ներդրումներ անել Հայաստանում՝ սա պատմական նշանակություն ունեցող փաստ է»։ Անդրադառնալով Եվրոպական միությանը Հայաստանի անդամակցելու հեռանկարին, Նիկոլ Փաշինյանն ասել է. «Եթե ԵՄ-ում ընդունեն Հայաստանին, միայն ուրախ ու երջանիկ կլինենք։ Եթե մեզ չեն ընդունի որպես ԵՄ անդամ, բոլոր դեպքերում մենք շահած կլինենք, որովհետեւ Հայաստանը կլինի եվրոպական ստանդարտներին համապատասխանող երկիր»։

Go to News Site