Речиси сите партии прекршиле одредени правила во кампањата за европските избори

Политичките партии и фондации неправилно потрошиле околу 1,5 милиони евра за време на кампањата за европските избори во 2024 година, покажуваат документите од надворешните ревизори и од финансискиот сектор на Европскиот парламент. Правилата за трошење јавни средства ги прекршиле речиси сите партии, со исклучок на Зелените и Европската демократска партија, како и две помали фондации (најчесто тинк-тенк организации поврзани со политичките партии). Извештајот на Генералниот директорат за финансии при Европскиот парламент укажува на прекумерни или непотребни трошоци во кампањата, непочитување на правилата за јавни набавки, како и користење средства за индиректно финансирање на националните политички партии, објави бриселскиот портал „Политико“. Вкупно, партиите и фондациите располагале со 74 милиони евра грантови од Европската Унија. Генералниот директорат во извештајот не ги наведува имињата на партиите и на фондациите кои неправилно ги користеле средствата, освен во случаи кога тие веќе ги оспориле наодите. Според „Политико“, две партии и две фондации дури пријавиле трошоци што никогаш не ги направиле, но останале анонимни бидејќи не поднеле жалба на наодите. - Меѓу многуте причини за рекласификација на трошоците може да има и обид за измама при користењето јавни средства - изјави за „Политико“ Луј Друно, основач на организацијата „Јуропијан демокраси консалтинг“ (European Democracy Consulting) со седиште во Брисел, која ги следи донациите на партиите. Ваквите сметководствени практики биле споменувани и во претходните извештаи на финансискиот сектор на Парламентот, кој во новиот документ побара од партиите „да ја прекинат оваа практика“. „Секој сомнеж за нелегални активности, измама или корупција, надлежниот службеник мора да го пријави до Европската канцеларија за борба против измами (ОЛАФ) или до Европското јавно обвинителство (ЕППО)“, се наведува во соопштението на Парламентот. Во извештајот не се прецизира колку случаи се проследени до надлежните органи за 2024 година. „Поголемиот дел од рекласификациите се резултат на административни или процедурални грешки“, се додава во документот.

Go to News Site