Зедер: Повлекувањето на американските трупи од Германија е разбеснувачко и опасно

Одлуката на САД за повлекување на трупите од Германија е „разбеснувачка и опасна“, изјави денеска баварскиот премиер Маркус Зедер, пренсе ДПА. За време на посетата на Брисел, Зедер рече дека е потребна јасност во врска со американските планови, поради извештаите дека базите погодени од планираното повлекување на 5.000 војници се наоѓаат во Баварија, јужната федерална покраина што со години наназад ја предводи неговата Христијанско-социјална унија (ЦСУ), помалиот партнер во владејачката ЦДУ-ЦСУ. Се верува дека Вашингтон планира да го откаже распоредувањето ракети со среден дострел во Германија. „Сè уште не знаеме со сигурност дали американските трупи ќе бидат повлечени, и ако е така - како што сугерираат вестите - од Баварија“, рече Зедер, еден од највлијателните конзервативни политичари во земјата. „Исто толку разбеснувачко е колку што е опасно што Америка размислува да не не снабдува со оружје со среден дострел. И двете се разбеснувачки и опасни“, рече тој, пренесува германската агенција. Со ова , се добива впечаток дека Зедер го обвини својот конзервативен сојузник, канцеларот Фридрих Мерц, за развојот на настаните, откако канцеларот  го предизвика американскиот претседател Доналд Трамп со своите критики за војната во Иран. „Не сме сосема сигурни дали навистина беше потребно ова да се случи“, рече баварскиот премиер, додавајќи дека проблемите се појавиле „делумно во Берлин“ и „мора таму да се решат“. Проблемот не може едноставно да се признае со кревање раменици, рече тој, повикувајќи ја германската Влада да се бори за поништување на одлуката. „И покрај целата смиреност и смиреност - ова се сериозни прашања кога се повлекуваат војници“, додаде Зедер. Според неколку медиумски извештаи, на повидок е повлекувањето на американската борбена бригада од Вилсек, во Баварија, пренесе ДПА. Како дел од планираното намалување на американските трупи во Германија, се наведува дека Пентагон го откажал и планираното распоредување на единица за ракување, одржување и сервисирање на ракетите со среден дострел. (МИА)

Go to News Site