Ազատություն
Վարչապետ Նիկոլ Փաշինյանը վերջին երեք տարիների ընթացքում առաջին անգամ այս տարի չի մասնակցի Մոսկվայում մայիսի 9-ին կայանալիք Հաղթանակի շքերթին։ Այսօր, պատասխանելով լրագրողների հարցին, Փաշինյանն ասել է, որ դեռևս Մոսկվա կատարած իր նախորդ այցի ընթացքում՝ ապրիլին է Պուտինին ասել, որ չի լինելու Կարմիր հրապարակում։ «Ես Ռուսաստանի Դաշնություն կատարած իմ այցի ընթացքում ՌԴ նախագահին տեղեկացրել եմ, որ քարոզարշավի բերումով չեմ կարողանա մասնակցել մայիսի 9-ի միջոցառումներին»։ Փաշինյանը չի հստակեցրել, թե իր փոխարեն ՀՀ այլ պաշտոնյա կմեկնի՞ Մոսկվա, թե ոչ։ Նիկոլ Փաշինյանը՝ «ՌԴ այլ բարեկամ երկրների շարքում» հրավիրվել է Մոսկվայում կայանալիք շքերթին, երեկ հայտարարել էր Հայաստանում ՌԴ դեսպան Սերգեյ Կոպիրկինը։ Օրեր առաջ Ուկրաինայի նախագահ Վոլոդիմիր Զելենսկին Երևանում հայտարարել էր, որ այդ օրը «ԱԹՍ-ները բզզալու են Մոսկվայի Կարմիր հրապարակի վրա»։
Go to News Site