Fréttastofa RÚV
Þúsundir barna sem voru ættleidd til Danmerkur frá Suður-Kóreu fyrir síðustu aldamót voru tekin með ólöglegum hætti af foreldrum sínum. Átta þeirra hafa höfðað mál gegn danska ríkinu fyrir brot á mannréttindum. Alls voru um níu þúsund börn ættleidd á þennan hátt á 8., 9. og 10. áratug síðustu aldar. Átt hafði verið við ættleiðingarskjöl margra þeirra og börnin ranglega skráð týnd eða yfirgefin, þegar þau höfðu í reynd verið tekin frá foreldrum sínum. Ættleiðingum milli landanna hefur verið hætt, og stjórnvöld í Suður-Kóreu hafa beðist afsökunar. Það hafa stjórnvöld í Danmörku ekki gert, og í nóvember 2024 hafnaði félagsmálaráðuneytið bótakröfu þar sem málið væri fyrnt. Síðan þá hefur málsókn verið í undirbúningi fyrir mannréttindabrot danskra stjórnvalda.
Go to News Site