Knappur tími til að flytja fólk úr Hondiusi vegna veðurs

Skemmtiferðaskipið Hondius, þar sem hantaveira hefur komið upp, er á leið til Tenerife og er búist við því þangað á sunnudagsmorgun. Veðurspáin er þannig að skipið þarf að leggja af stað frá Tenerife á mánudag. Því þarf að hafa hraðar hendur við að flytja 150 manns úr skipinu. Talsmaður veðurstofu Kanaríeyja sagði við fjölmiðla í dag að eina tækifærið til að flytja fólk úr skipinu verði frá hádegi á sunnudag og áður en veðrið versnar á mánudag. Verði fólkið ekki flutt í land á þessum tíma gefist mögulega ekki tækifæri næst á Tenerife fyrr en í lok mánaðarins. Skipið hefur verið í kastljósi fjölmiðla um allan heim síðustu daga. Þrír létust um borð eftir að skipið lagði úr höfn í Argentínu í apríl. Þrír voru fluttir frá borði undan Grænhöfðaeyjum á dögunum. Enn eru um 150 manns um borð í skipinu, farþegar og áhöfn. Búist er við skipinu til Granadilla á Tenerife á sunnudagsmorgun. Stjórnvöld á Spáni heimiluðu skipinu að koma, þrátt fyrir óánægju stjórnvalda á Kanaríeyjum. Skipið kemur ekki í höfn í Granadilla heldur verða farþegar fluttir á brott á minni bátum. Þaðan verða þeir fluttir með rútu á flugvöll og fluttir úr landi. Stjórnvöld í Bandaríkjunum tilkynntu í dag að flugferð hafi verið skipulögð frá Tenerife fyrir þá Bandaríkjamenn sem eru um borð. Fólkið um borð er af 23 þjóðernum.

Go to News Site