Tveggja flokka kerfið liðið undir lok

Verkamannaflokkurinn hlaut sögulega slæma kosningu þegar kosið var til sveitarstjórna á Englandi í gær. Umbótaflokkur Nigels Farage stór jók við fylgi sitt. Sögulegur ósigur Verkamannaflokksins Kosið var um sex borgarstjórastöður og fimm þúsund fulltrúar voru kjörnir í sveitarstjórnir. Einnig var kosið til þings í Wales og Skotlandi. Reform, Umbótaflokkur Nigels Farage, stórjók við fylgi sitt og bætti við sig að minnsta kosti rúmlega 1400 sveitarstjórnarfulltrúum á Englandi. Flokkurinn náði til sín sætum frá bæði Verkamannaflokknum og Íhaldsflokknum. Verkamannaflokkurinn tapaði yfir 1300 fulltrúum hið minnsta og beið sögulegan ósigur í Wales eftir 27 ár við völd. Ólíklegt að Starmer verði leiðtogi í næstu kosningum Bogi Ágústsson fréttamaður segir stöðu Keir Starmer, forsætisráðherra og leiðtoga Verkamannaflokksins, slæma. Framtíð hans gæti ráðist á næstu þremur sólarhringum. „Aðrir fréttaskýrendur segja að þó að hann fari ekki núna þá sé hann varla langtímaleiðtogi fyrir Verkamannaflokkinn.“ Þó hafi flokkurinn heldur ekki neina hefð fyrir því að skipta um leiðtoga þegar hann sé við völd. Erfitt sé að segja til um hvort pólitíski ferill Starmers lifi þetta af. „Við skulum orða það þannig að það er ólíklegt að hann verði leiðtogi Verkamannaflokksins í næstu kosningum, 2029.“ Tveggja flokka kerfið í breskum stjórnmálum er sennilega úr sögunni, ef marka má stjórnmálaskýrendur. Bogi Ágústsson telur ólíklegt að Starmer verði leiðtogi Verkamannaflokksins í næstu kosningum. Vandræði andstæðinga Starmers séu þó þau að það er enginn augljós sem gæti tekið við og Verkamannaflokkurinn sameinast um. Af þeim nöfnum sem hafa verið nefnd sem mögulegir eftirmenn Starmers eru Wes Streeting, Angela Reyner og Andy Burnham, borgarstjóri Manchester. Hann á ekki sæti á þingi og getur því ekki boðið sig fram. Allir stjórnmálaskýrendur eru sammála um að óvinsældir Starmers hafi verið ein meginástæðan fyrir þessu mikla tapi Verkamannaflokksins. Kjósendur búnir að fá nóg af báðum stóru flokkunum Margir kjósendur telja að allt sé í kaldakoli í Bretlandi. Lífskjör versni, heilbrigðiskerfið sé í lamasessi og engin von sé fram undan um betri tíð. Fólk á erfitt með að ná endum saman og ungt fólk kemst ekki inn á húsnæðismarkaðinn. „Sir John Curtice, sem er Ólafur Harðarson þeirra Breta, segir að Verkamannaflokkurinn hafi brugðist væntingum kjósenda og það sem meira sé þá telji kjósendur að flokkurinn hafi ekkert plan. Það er engin von hjá þeim.“ Verkamannaflokkurinn lofaði að bæta úr með efnahagslegum vexti en það hefur ekki gengið eftir. Við þessar aðstæður myndast markaður fyrir fólk sem býður upp á einfaldar lausnir og kennir innflytjendum um allt sem gengið hefur úr skorðum. „Það er kaldhæðni örlaganna að maðurinn sem á kannski mestan þátt í Brexit skuli vinna mikinn sigur þegar meirihluti Breta telur Brexit hafa verið ranga ákvörðun.“ Kjósendur eru búnir að fá nóg af báðum stóru, gömlu flokkunum. „Þess vegna leita þeir til einhverra sem eru með einfaldar lausnir, tala digurbarkalega og segjast geta ráðið úr þessu.“ Fimm flokka kerfi Bogi telur tveggja flokka kerfið liðið undir lok. „Einn fréttaskýrandi talaði um það í dag að við þyrftum að tala um fimm flokka kerfi. Það er að segja Umbótaflokkinn, Íhaldsflokkinn, Frjálslynda demókrata, Verkamannaflokkinn og Græna, sem hafa bætt verulega mikið við sig. Þannig að þetta er allt annað landslag.“ Þetta á landsvísu og svo eru Plaid Cymru og Skoski þjóðarflokkurinn stærstu flokkarnir í Wales og Skotlandi.

Go to News Site