Fréttastofa RÚV
Volodomyr Zelensky Úkraínuforseti og Vladimír Pútín Rússlandsforseti hafa báðir samþykkt þriggja daga vopnahlé og skipti á stríðsföngum. Donald Trump Bandaríkjaforseti tilkynnti um vopnahléið á Truth Social fyrr í kvöld og sagði að hann hefði lagt það til. Vopnahléið gildir 9., 10. og 11. maí. Þá er ráðgert að Rússar og Úkraínumenn skiptist á 1000 stríðsföngum frá hvoru landi. Áður hafði Pútín lýst yfir einhliða vopnahléi 8. og 9. maí – og Zelensky lýsti sömuleiðis yfir einhliða vopnahléi í 6. maí. Í dag verða mikil hátíðarhöld í Moskvu þegar sigri á nasistum í seinni heimsstyrjöld er fagnað. Hátíðarhöldin eru þó lágstemmdari í ár en áður og engin hernaðarleg farartæki eða hergögn verða til sýnis í ár. Sýningin í fyrra var mun umfangsmeiri og um 30 erlendir þjóðarleiðtogar mættu sem gestir. Í ár er búist við aðeins þremur þjóðarleiðtogum, frá Belarús, Laos og Malasíu.
Go to News Site