Fréttastofa RÚV
Sveitarstjórn Flóahrepps hefur ákveðið að leggja fyrir íbúakönnun um afstöðu til sameiningar sveitarfélagsins við annað sveitarfélag. Íbúar greiða atkvæði í könnuninni samhliða sveitarstjórnarkosningum 16. maí. Íbúar verða spurðir hvort þeir vilji að sameining verði skoðuð; og hvort þeim hugnist samtal við Árborg, Ölfus, Hveragerði, Skeiða- og Gnúpverjahrepp, öll sveitarfélög í uppsveitum Árnessýslu, austan við Þjórsá eða hreinlega að öll Árnessýsla skoði sameiningu. Niðurstöðurnar eru ekki bindandi en sveitarstjórn Flóahrepps segir þær verða gott veganesti fyrir nýja sveitarstjórn að vinna með. Bæjarráð Árborgar samþykkti í haust að fara þess á leit við sveitarstjórn Flóahrepps að sveitarfélögin hæfu viðræður um sameiningu. Sveitarfélagið keypti land í Flóahreppi 2014 og vill að það verði innan sveitarfélagamarka sinna. Því vill Árborg ræða sameiningu eða tilfærslu sveitarfélagamarkanna. Árni Eiríksson, oddviti í Flóahreppi, sagði þá að engin knýjandi ástæða væri fyrir sameiningu . Sveitarfélagið stæði til að mynda sjálft að rekstri grunnþjónustu, líkt og skóla, og fjárhagur þess hefði staðið ágætlega frá því að Flóahreppur var myndaður 2006 við sameiningu Hraungerðishrepps, Gaulverjabæjarhrepps og Villingaholtshrepps.
Go to News Site