Fréttastofa RÚV
Aganefnd HSÍ, handknattleikssambands Íslands, hefur fundað og skilað niðurstöðu um atvik sem átti sér stað á leik ÍBV og Vals í úrslitaeinvíginu um Íslandsmeistaratitil kvenna í handbolta í Vestmannaeyjum sl. þriðjudag. Á 32. mínútu leiksins heyrist sungið úr stúkunni „Hafdís fílar skæri“ sem er vísun í kynlíf tveggja kvenna og beindist að Hafdísi Renötudóttur, markverði Vals. Atvikið var tilkynnt til HSÍ og í erindi sem barst sambandinu vegna atviksins segir m.a. „ Ummælin vísa augljóslega með kynferðislegum og niðrandi hætti til kynhneigðar leikmannsins, sem er lesbía. Um er að ræða ósmekklega, særandi og homófóbíska framkomu sem á engan hátt á heima innan íslensks handknattleiks eða í íþróttastarfi almennt.“ Í 17. grein reglugerðar HSÍ um agamál er fjallað um brot áhorfenda og samkvæmt greininni er aganefnd m.a. heimilt að beita félag viðurlögum ef áhorfendur gerast sekir um vítaverða framkomu gagnvart leikmönnum. Í úrskurði aganefndar HSÍ segir m.a. að nefndin hafi kynnt sér gögn málsins, þ.m.t. myndbandsupptöku og greinargerð ÍBV. Í niðurlagi úrskurðar aganefndarinnar segir að niðurstaðan sé að handknattleiksdeild ÍBV verði gerð sekt og teljist hún „hæfilega ákveðin 150.000 krónur.“ Handknattleiksdeild ÍBV brást við atvikinu með yfirlýsingu á fimmtudaginn þar sem Hafdís var beðin afsökunar og upplýst að umræddur stuðningsmaður hafi verið settur í tímabundið bann. Liðin mætast aftur í Eyjum á þriðjudag ÍBV vann stórsigur á Val í þriðja leik liðanna í einvíginu í gærkvöld og minnkaði þar með muninn í einvíginu í 2-1. Liðin mætast því aftur í Vestmannaeyjum á þriðjudag og geta Valskonur með sigri þá tryggt sér Íslandsmeistaratitilinn. Ljóst er að umræddur áhorfandi fær ekki að mæta á þann leik.
Go to News Site