Fréttastofa RÚV
Grindavík og Tindastóll mættust öðru sinni í einvígi liðanna um Íslandsmeistaratitil karla í körfubolta í kvöld. Grindavík leiddi einvígið 1-0 en bætti um betur því liðið vann leikinn í Síkinu í kvöld, 86-83. Forystan sveiflaðist á milli liðanna en aldrei munaði meiru en 11 stigum á liðunum. Heimamenn í Tindastóli höfðu tveggja stiga forskot í leikhléi, 42-40. Grindvíkingar byrjuðu seinni hálfleik vel og Ólafur Ólafsson kom liðinu 11 stigum yfir, 45-56, með þriggja stiga körfu um miðjan þriðja leikhluta. Jafnt var í stöðunni 79-79 þegar mínúta var eftir en gestirnir reyndust seigari á lokamínútunum og lönduðu loks naumum þriggja stiga sigri, 83-86. Grindavík leiðir einvífið því 2-0 og lið Tindastóls er komið upp við vegg. Liðin mætast í Grindavík á föstudag þar sem bikarinn gæti farið á loft.
Go to News Site