Mediamax
Երեւան: Մեդիամաքս: Մայիսի 11-ից 12-ը Երեւան կատարած այցի արդյունքներով Եվրոպայի խորհրդի խորհրդարանական վեհաժողովի (ԵԽԽՎ) պատվիրակությունն ընդգծել է 2026 թվականի հունիսի 7-ին կայանալիք խորհրդարանական ընտրությունները «վախից, օտարերկրյա անպատշաճ ազդեցությունից եւ վարչական ռեսուրսների չարաշահումից զերծ մթնոլորտում» անցկացնելու կարեւորությունը։ Հայտարարության մեջ, մասնավորապես, ասվում է. «Պատվիրակությունը մտահոգություն է հայտնել, որ օտարերկրյա միջամտությունը ավելի բարդ ու համակարգային բնույթ է ստանում՝ ազդելով Հայաստանի քաղաքական եւ տեղեկատվական դաշտի վրա: Պատվիրակությունը նշել է, որ օտարերկրյա միջամտությունը դուրս է եկել ավանդական ապատեղեկատվության շրջանակներից եւ այժմ ներառում է քաղաքական ուժերի ապօրինի ֆինանսավորում, կիբերհարձակումներ, տնտեսական ճնշումներ եւ ընտրական գործընթացը մանիպուլացնելու ուղղակի փորձեր։ Այս հիբրիդային մեթոդները նպատակաուղղված են ոչ միայն հանրային կարծիքի վրա ազդելուն, այլեւ Հայաստանի նկատմամբ երկարաժամկետ աշխարհաքաղաքական լծակներ ձեռք բերելուն։ Պատվիրակությանը տեղեկացրել են Ռուսաստանի նախագահի կողմից Հայաստանի վարչապետին ուղղված ուղղակի եւ միանշանակ դիմումների մասին՝ Ռուսաստանում հայկական սփյուռքի քվեարկությանը աջակցելու, ինչպես նաեւ գլխավոր ընդդիմադիր կուսակցության կողմից սփյուռքի այդ հատվածին առաջարկված ֆինանսական խթանների մասին՝ ընտրությունների օրը Հայաստան մեկնելու եւ քվեարկելու համար։ Պատվիրակությունն ընդգծել է, որ նման միջամտությունը մշտական եւ ադապտիվ սպառնալիք է, որը դուրս է գալիս նախընտրական շրջանի սահմաններից։ Պատվիրակությունը նաեւ արձանագրել է որոշ արեւմտյան գործընկերների կողմից իշխող կուսակցությանը ցուցաբերվող դեկլարատիվ աջակցությունը»: Հայտարարության մեջ նաեւ նշվում է, որ «պատվիրակությունն արձանագրել է նաեւ Հայ Առաքելական եկեղեցու աննախադեպ ներգրավվածությունը քաղաքականության մեջ»։
Go to News Site