Sögur frá Íslandi og Póllandi mætast á Egilsstöðum

VOR/WIOSNA byggist á hugmyndinni um sagnalist í víðum skilningi, þar sem sögur eru skapaðar með mynd, hreyfingu, hljóði og ýmsum listformum. Í ár er enn á ný sjónum beint að frásögninni sem upphafspunkti að samveru fólks og ólíkra upplifana. „Að segja sögur er ein elsta og öflugasta birtingarmynd mannlegrar tjáningar. Það þarf mjög lítið: þann sem segir söguna og þann sem hlustar, en krefst jafnframt hugrekkis beggja aðila, sérstaklega þegar sögurnar eru persónulegar. Sagnalist verður þannig leið til að kynnast hvert öðru,“ segir Wiola Ujazdowska skipuleggjandi hátíðarinnar. Hún bendir á að munnleg hefð hafi sérstaka stöðu á Íslandi og nái aftur til landnáms. Í aldanna rás hafi lög, ljóð og þekking verið varðveitt í munnlegri geymd og miðlað munnlega, með upplestri, söng og ljóðum á borð við Eddukvæði. Rými fyrir pólskar raddir á Íslandi Hátíðin fer fram í Sláturhúsinu á Egilsstöðum og er vettvangur þar sem pólskir og íslenskir listamenn mætast. Í forgrunni er miðlun ólíkrar reynslu og sýnileg nærvera pólskrar listsköpunar í íslensku samhengi. „VOR er vettvangur þar sem pólskar raddir á Íslandi geta hljómað og fengið að heyrast, og gestir fá tækifæri til að kynnast þeim,“ segir Wiola Ujazdowska. Á dagskrá er opnun sýningarinnar Woven Ground eftir Martynu Bogaczyk, leirlistarsmiðjur sem Wiola Ujazdowska leiðir og hreyfismiðjur Patrycju Bączek. Einnig verður sýnd kvikmyndin Paweł and Wawel eftir Krzysztof Kaczmarek, og eftir sýningu verða umræður. Þá verður frumsýning og önnur sýning á tveimur einleikjum í leikstjórn Hallveigar Eiríksdóttur, sema Sylvíu Zajkowska og Norbert Stałęg flytja. Einleikirnir byggjast á textum Maó Alheimsdóttur. Wiola segir að hátíðin sé ekki aðeins sýningarvettvangur heldur sameiginlegt skapandi rými. Með textíl, hreyfingu, leiklist, kvikmyndum og handverki skapar hátíðin rými fyrir frásagnir, reynsluskipti og sameiginlega vinnu ólíkra listforma, tungumála og menningarlegra samhengja. Kosningar trufla ekki Wiola Ujazdowska skipuleggur hátíðina ásamt Ragnhildi Ásvaldsdóttur. Allir viðburðir verða í Sláturhúsinu að Kaupvangsstræti 9 á Egilsstöðum og eru gestum að kostnaðarlausu. Dagsetningin 15.–17. maí var ákveðin með góðum fyrirvara, þegar á síðasta ári, til að tryggja þátttöku boðinna listamanna. Hluti þeirra býr í Reykjavík og Selfossi, aðrir höfðu þegar skipulagt utanlandsferðir. Skörun við sveitarstjórnarkosningar breytti ekki fyrirhugaðri dagskrá. „Þegar við fengum vitneskju um að einn dagur hátíðarinnar félli saman við kosningar, skipulögðum við dagskrána þannig að þátttakendur gætu kosið. Þeir sem koma utan svæðisins voru einnig upplýstir um möguleika á forkosningu,“ segir Wiola . Ekki er hefð fyrir því að fella niður menningarviðburði vegna kosninga. Á sama tíma fara fram aðrir viðburðir, meðal annars ljósmyndahátíðin Ljósmyndadagar á Seyðisfirði og tónleikar lúðrasveitar. Tækifæri til að kynnast nágrönnum Íslendingar, Pólverjar og fólk af öðrum þjóðernum sýnir hátíðinni áhuga. „Við vinnum með mörgum listamönnum af pólskum uppruna. Við vinnum einnig með ýmsum stofnunum í Póllandi og meðal annars í Noregi,“ segir hún. „Mér finnst að eitt merki um áhuga sé að leirlistarsmiðjurnar voru fullbókaðar strax daginn eftir að þær voru auglýstar. Á sama tíma skiljum við staðbundið samhengi – hér á svæðinu geta jafnvel 20 manns talist góð aðsókn,“ segir Wiola. Hátíðin er orðin fastur hluti af menningarlífi í sveitarfélaginu Múlaþingi og dregur að sér fjölbreyttan hóp gesta. „Á viðburðinn koma bæði Pólverjar, Íslendingar og fólk af öðrum þjóðernum. Ég hef þá tilfinningu að hátíðin stuðli ekki aðeins að kynningu á pólskri menningu heldur skapi líka rými þar sem fólk kynnist nágrönnum sínum frá Póllandi.“

Go to News Site